Sorkar laipuiin Covid-19 vanga Inkhuahkhirhna kalpui zel a duh

Sorkar laipui chuan Covid-19 léng mekin India ramah kiam lam a pan theih loh avangin state tinte chu inkhuahkhirhna uluk taka kalpui zel rih turin a hriattir.

Union Home secretary Ajay Bhalla chuan May 27 khan state tin chief secretary-te hnenah lehkha a thawn a; Ministry of Home Affairs (MHA)-in April 29, 2021-a Ministry of Health & Family Welfare (MoHFW) thuràwn anga inkhuahkhirhna kalpui tura tihna chu June 30, 2021 thleng atan pawhsei a nih thu a tarlang a ni.

Union Home Secretary tarlan danin, inkhuahkhirhna khauh taka kalpui leh Covid-19 vei an tlem theihna tura hmalakna dangte avangin India ramah chhim lam leh hmarchhak lam tih lohah chuan hripui vei thar leh hripui vei mek an tlahniam a; hripui vei hmuh thar a tlakhniam rualin, vei mek an la tam hle bawk.

Khauh taka inkhuahkhirhna kalpui a la ṭul hle tih tarlangin Ajay Bhalla chuan, "A hunin a zir tawh a nih erawh chuan khawtlang dinhmun, mamawh leh resource neihte zir chian hnuah inthlahdul deuh hlek pawh tih theih a ni," a ti.

Union Home Secretary chuan, chief secretary-te chu MoHFW-in April 25, 2021-a ruahmanna an siam anga inkhuahkhirhna kalpui zel tura hriattirin, "District authority-te hnenah thil ṭulte hriattir tur a ni," a ti a; inkhuahkhirhna chi hrang hrangte chu a zau thei ang berin mipui hriat tura puanzar tur a nih thu a tarlang bawk.