Ram hruaitute an che chhuak mek

Covid-19 hripui léng leh inkhârkhip avangin ram hruaitute chu an bial chhungah ṭanpuina leh chhawmdawlna hna thawkin an che chhuak mek zel a; niminah pawh khan mi eng emaw zatin ṭanpuina an pe.

Minister of state K Lalrinliana chuan nimin khan a bial, Kolasib-a lirtheia eizawng intélkhawm pawl hrang hrang hnenah lirtheia eizawnnaa harsatna tâwkte ṭanpui nan Rs. 30,000 ṭheuh leh Kolasib MJA hnenah Rs. 50,000 a pe. Kolasib-ah hian taxi khalha eizawng mi 150, auto-rickshaw khalh a eizawng mi 200 vel leh maxicab khalha eizawng mi 48 vel awm mek a ni.

East Tuipui bialtu MLA Ramthanmawia pawhin nimin khan a bial chhunga primary health centre (PHC) pali - Farkawn, Khawbung, Bungzung leh Sesih damdawi-inte hnenah khawtlang hruaitute kaltlangin Rs. 25,000 ṭheuh a pe.

Lunglei South bialtu MLA Dr K Pachhunga chuan a bial chhunga Lunglei Polytechnic Covid care centre (CCC) chu a tlawh a; CCC-a enkawltu doctor-te nen inkâwmin, an mamawh leh harsatnate a sawipui a, harsatnate chu a hma thei ang bera chinfel a nih tur thu a sawi. MLA hian Luangmuala quarantine centre-ah pawisa a pe bawk.

Aizawl West-I bialtu MLA Zothantluanga chuan nimin khan a bial chhunga khaw pathum - Sairang, Sairang Dinthar leh Sihhmui ten an din Sairang Joint VC hnenah ambulance bakah, ambulance driver hâk tur PPE set sarih leh oxygen concentrator a pe.

Aizawl North-I bialtu MLA Vanlalhlana chuan May 27, Ningani khan a bial chhunga veng hrang hrang - Chaltlang, Chaltlang Lily Veng, Durtlang leh Durtlang Leitana LTF duty-te a tlawh kual a, khawtlang mamawh leh harsatnate a sawipui. Chaltlang leh Chaltlang Lily Venga community covid care centre hmunhma buatsaih tur leh ruahmannate chu LTF hruaitute nen a ṭul anga hmalak zel tur a nih thu a sawi a; hmanrua leh bungruate pein, "A ṭul dan angin ngaihtuah zel a ni ang" a ti.