Congress leh ZPM party ṭhalaite'n lirtheia eizawngte ngaihven ṭul ti

Congress party ṭhalaite chuan, Covid-19 leng laka invenna atana total lockdown leh inkhuahkhirhna hun rei tak kalpui a nih tawh avangin sumdawngte leh lirtheia eizawngte tan sorkarin ruahmanna a siam ṭul an tih thu an tarlang a; ZPM Ṭhalai pawhin lirtheia eizawngte ngaihven an ngaih thu an tarlang bawk.

Mizoram Pradesh Youth Congress Committee chuan, thla khat chuang lockdown a nih tawh avangin hriat phâk loh harsatna tâwk tam tak an awm mek tih tarlangin, "Hetianga harsatna tâwk mek, a bikin lirthei lama eizawngte leh sumdawng ṭhenkhatte tan sorkar hian ruahmanna siamsak turin kan ngen a ni," an ti.

Swab sample endik kawngah sorkarin hma a lâk chak tawk loh avangin sample lâk tawh kar khat dawn lai result nghah ngaite an awm tih sawiin MPYCC chuan, "Tun hnai maia Health Minister inthlahdah vanga Lungleia TrueNat khawla sample enna test kit a awm lo ringawtte hi a vanduaithlak tak zet a ni," an ti a; swab test chu mumal zawka kalpui a ngaia an hriat thu an sawi.

Sorkar chu ngaih pawimawh hmasak turte ngai pawimawh tura an duh thu sawiin MPYCC chuan, "A ṭul hmasa loa sum hmanna tam tak hi titawp vat rawh se. Airport renovation-a cheng tluklehdingâwn dáwn hman ralte leh PAHOSS atana cheng vaibelchhe tam tak sên ral te, SEDP board-a vaibelchhe tél hman ral hi titâwp ngam rawh se," an ti. Covid-19 donaa sorkar lama thawktute leh task force-te inpekna chu ropui an tih thu an sawi bawk.

ZPM Ṭhalai chuan, inkhàrkhip kalpui mek chu May 31, 2021-a tàwp tur a nih thu sawiin, "Hripui léng thawh hnihna avangin hun rei tak chu hna thawk thei loa mipui kan awm avangin, eichawp zawng, a bikin commercial vehicle hmanga eizawng chhungkuate'n an tuar nasa em em a ni," an ti a; lirtheia eizawngte ngaihven a ṭul thu an tarlang.

Medical Operational Team on COVID-19 ten inkharkhip chu AMC chhungah kalpui zel tura rawtna sorkarah thlen an tum tih sawiin ZPM Ṭhalai chuan, "Inkharkhip hi chhunzawm a nih chuan commercial vehicle hmanga ei zawng chhungkuate hnenah, an chhungkaw intunnunna tura sumfai hmanga luang chhuak turin Mizoram sorkar kan ngèn. An zingah loan laa motor lei, lockdown vanga loan an rulh theih loh avanga an motor chán mai thei dinhmuna ding leh mi in luaha khawsa, khawsak harsa tam tak an awm mek a ni," an ti.

ZPM Ṭhalaite chuan, Covid-19 léng chungchangah thuneitute tan thutlukna siam a harsa tih an hriatpui thu an sawi a; chutih rualin, khawsak harsa zawkte hre reng chunga rorelna felfai zawk siam a, rilru zau leh thui tak pu tur leh mipui tana thil phal deuh turin Mizoram sorkar an ngèn a ni.