Covid-19 vei hmuh chhuah zingah Chhungkuaa inkaichhawng an tam

Health minister Dr R Lalthangliana hoin May 29, Inrinni khan Secretariat conference hall-ah sorkar official-te leh Aizawl City Local Council Association (ACLCA) hotute'n Covid-19 veite sûlhnu chhui (contact tracing) chungchang an sawiho a; May 1-28 chhunga hripui vei hmuh chhuah zingah Covid vaccine dawn tur ang dawng kim tawh mi pariat an tel tih tarlan a ni.

Ṭhutkhawma tarlan danin, May thlaa hripui vei hmuh chhuah zingah Covid-19 vaccine - Covishield dawn tur ang (dose hnih) dawng kim tawh mi pariat an tel a; first dose chauh dawng hman mi pali an awm bawk.

May 1-28 chhungin Mizoramah hripui vei mi 5,528 (mipa 2,825 leh hmeichhia 2,703) hmuh chhuah a ni a, chu'ng zinga 3,949 chu Aizawl district-a mite niin, 71.44% a tling. Hnahthial district-ah mi pakhat chiah hmuh chhuah a ni thung.

Mi 5,528 zinga 2,650 (47.93%)-in Covid symptom an nei a, tualchhunga kái chhâwng 3,297 (59.64%) awmin, chu'ng zingah chuan kàina chin hriat loh mi 1,580 (28.58%) an awm a; frontline worker 51 (0.92%) an tel bawk. Mi 5,528 zingah Mizoram páwn aṭanga rawn lut chu mi 600 (10.85%) an ni.

Hripui vei hmuh chhuahte sûlhnu chhuinaa a lan danin, chhungkuaa hripui inkài chhâwng an tam a, chhungkhat laina intlawh, ṭhian ṭhate leh ṭhenawm hnaite nena inlènpawh aṭanga kái eng emaw zat an awm.

Chhungkuaa mi pakhat aia tam a ruala hripui vei hmuh chhuah chhungkaw 669, chhungte hnena kâi chhawng awmna chhungkua 725, laináte tlawhna aṭanga kái mi 121, ṭhenawm hnaite tlawhna aṭanga kái mi 195, ṭhiante nena intlawh vanga kái mi 81, hna thawhna hmuna kái mi 122 leh, negative certificate neih duh vanga sample endiktir zingah hripui vei 14 an awm. Bazar, lu mehna dawr leh thil dang aṭanga kai eng emaw zat an awm bawk.

Police Contact Tracing Team-te chuan, hripui vei hmuh thar zingah anmahni nena inkungkaihna neite sawi hreh an awm ṭhin chu an harsatna lian ber a nih thu an sawi a, "Mi dangte hêk nia inngai an awm tlat avanga an zêp ṭhin hian harsatna a siam nasa. Mi dangte an him zawk nan an contact-te ṭha takin sawi ṭhin se. Hemi chungchangah hian ruahmanna uluk taka siam a ṭul," an ti.

Ṭhutkhawmah hian Medical Opera­tional Team of Covid-19 chairman Dr ZR Thiamsanga, Health secretary R Lalramnghaka, DIG (Northern Range) Lalbiakthanga Khiangte, Aizawl DC Dr Lalhriatzuali Ralte, Health department leh ACLCA aiawhte an tel a ni.