June 7 thleng lockdown pawtsei

Mizoramah Covid-19 léngin ziaawm lam a la pan theih loh avangin Mizoram sorkar chuan June 7, 2021 zing dar 4 thleng total lockdown pawhsei a nih thu May 29, Inrinni tlai khan a puang a; inkaihhruaina, standard operating procedure (SOP) a tichhuak nghal.

Mizoram State Disaster Management Authority (SDMA) chuan, "Mizoram chhunga Covid-19 dona atan hun rei tak chhung lockdown kalpui a ni tawh a. Heti chung hian hri kai thar tam tak an la awm zel avang leh hri kaiin kiam lam a la pan theih rih loh avangin inkhuahkhirhna hi kalpui chhunzawm zel a ṭul niin a lang," a ti.

SDMA chuan, Aizawl khawpuiah hri kai thar an tam avangin nasa taka inkhuahkhirh a ṭul zual tih tarlangin, "Mimal eizawnna leh sumdawnna, kohhran leh pawl hmalaknate leh khawtlang nun nasa taka a nghawngzia hre reng chungin, mipui himna atan hmalak chhunzawm a ṭula hriat a ni," a ti a; total lockdown kalpui mek chu tlema tidanglamin May 31 zing dar 4 aṭanga June 7, 2021 zing dar 4 thlenga hman turin pawhsei a nih thu a tarlang.

SOP thara a lan danin, AMC area-ah total lockdown khauh taka kalpui tur a ni a, dawr hawn dan tihdanglam a awm nual. District head­quarters-ah chuan district thuneitute'n kaihhruaina hranpa an siam dawn a, khaw dangah chuan inkhuahkhirhna thlahdul hret a ni.

Lockdown SOP thar ṭhenkhat
1. AMC páwnah Mizorama bungraw awm sa leh siam chhuah/tharte thiar chungchangah inkhuahkhirhna a awm lo.
2. AMC chhungah chhiatna thleng thei laka invènna leh phalna neia hnathawkte bungraw mamawhte DC/incident commander-te phalna lain thiar theih a ni.
3. Aizawl leh district khawpui tih loh khaw dangah inkhuahkhirhna thlahdul a ni a, mahni khua chhuahsana zin veivah khap a ni.
4. Chhiat tawh leh dam lohna (medical emergency)-a kal chhuah ngai tan LTF/VTF lehkha lak tur a ni a, loh theih loh thila zin ṭulnaah DC/SDO(Civil)/BDO aṭangin phalna lak tur.
5. Inkhuahkhirhna hian college/university zirlai, online exam tura internet connection ṭhatna hmun pan turte a huam lo a, kal chhuahnaah student identity card leh admit card ken a ngai thung.
6. MGNREGA, MPLADS, MLALADS hnuaia hnate inkaihhruaina zâwm chunga thawh phal a ni.
7. Inkhuahkhirhnain a huam loh tur service/hmun zingah OSC, AH&Vety slaughter house leh septic tank service (êk paih) telh thar a ni.
8. Covid-19 dona leh hna ṭul bika sorkar pisa hawn theih zingah Forensic Science Laboratory leh National Informatic Centre telh a ni.
9. AMC páwn lamah DC/DDMA-te'n an district dinhmun azirin an district chhungah inkaihhruaina/inkhuahkhirhna an siam ang.
10. Aizawla dâwr hawn dan tur
i) Eichawp dawrte ni tin zing dar 8 thleng LTF ruahmannain hawn theih a ni.
ii) Zirtawpni zing dar 5 aṭanga tlai dar 5 inkarah thlai leh sa zawrh phal a ni a, zawrh turte chu LTF hriatpuinain Ningani zanah buaipui theih a ni.
iii) Thawhlehni zing dar 5 aṭanga tlai dar 5 inkarah thlai chi/ṭiak leh agriculture kaihhnawih bungraw zawrhna dawr, zirlaibu zawrhna dawr, motor oil leh spare part zawrhna dawr, motor siamna workshop/puncture work-te hawn phal a ni.
iv) Zirtawpni zing dar 5 aṭanga tlai dar 5 inkarah computer leh mobile zawrhna leh siamna dawr, hmasawnna hna thawhna atana bungraw mamawh - iron rod, balu, rawra, lung, leirawhchan, cement, electric bungrua, in sakna bungrua zawrhna dawrte hawn phal a ni.