KHAWTHLIR

Thisen pe
ṬKP, Nazareth Unit, Lawngtlai Council Veng chuan May 29, Inrinni khan Lunglei District Hospital tan thisen unit 22 an pe a, petute mipa 15 leh hmeichhia pasarih an ni.

Containment area
Aizawl, Lunglei, Serchhip leh Khawzawl DC-te chuan an district-a Covid-19 vei tam zualna khua/veng pariata hmun ṭhenkhat chu May 28 leh 29, 2021 khan containment area-ah an puang. Containment area puannate chu - Ramhlun South, Durtlang Leitan, Saron Veng, Tuithiang, Sairang Dinthar, Tlabung, Chhingchhip leh Dulte te a ni.

Tanpuina hlân
Siaha Manchester United Fans' chuan May 29, Inrinni khan Siaha khawpui chhunga village task force ṭhenkhat hnenah ṭanpuina pawisa fai leh tui an pe. Ṭanpuina an pekte chu an thawh khawm a ni a, veng panga task force duty post pariatah an pe a ni.

ZMC tlawh
Health minister Dr R Lalthangliana chuan May 28, 2021 tlai khan Covid-19 leng thawh hnihna hmachhawn dan leh thawh thumna thleng thei laka inbuatsaih dan thlirin Zoram Medical College (ZMC) a tlawh. Health Minister hian damdawi-ina hman tur transformer lian leh diesel generator lian dahna tur laih mek te, oxygen generating plant siam thar 200 LPM, kar khat liam taa bun fel tawh leh oxygen generating plant dang 300 LPM bunna tur hmunhma siam mek a tlawh a ni.

In kâng
Ṭawngṭai Bethel Camping Centre, Sakawrtuichhuna in pakhat chu nimin chawhma dar 10 vel khan bungraw chuh hman lohin a kâng ral. Thu dawn danin, inkhawm tura an kal khawm hlânin in hi a kâng a, in dang kâng kai tur erawh an veng thei a ni.

Zirlaibu thleng
Education department chuan sikul naupangte'n an inah zirna an chhunzawm theihna atan zirlaibu sem chhuak thuai turin hma an la a, Inrinni khan zirlaibu hi district hrang hrangah phurh thlen a ni.