Covid-19 vei Mizo pastor a thi

Baptist Church of Mizoram pastor Rev. Lal­hmingchhuanga Zongte, North India Mission, New Delhi-a Field Director chu May 29, Inrinni zing dar 4 khan Covid-19 vangin Indian Spinal Injuries Centre, New Delhi-ah a thi a, a nupui leh an fate pathum a kalsan.

BCM tarlan danin, Rev. Lalhmingchhuanga Zongte hi Covid-19 vei a ni tih April 26, 2021-ah hmuh chhuah a ni a, Indian Spinal Injuries Centre-ah dah luh nghal a ni. May 13 aṭangin ICU-ah enkawl a ni a, May 29 zing dar 3:30 velah cardiac arrest neiin, zing dar 4-ah a thi a ni.

A ruang hi vawiinah Mizoram rawn thlenpui beisei a ni a, a rawn thlen hunah BCM Shalom biak-in, Mission Vengthlangah vui nghal a ni ang.

Rev. Lalhming­chhuanga Zongte hi thu ziak mi a ni a, a lehkhabu ziah 'Savun kawrfual' tih chu Mizo Academy of Letters-in kum 2017 chhunga Mizo ṭawnga lehkhabu chhuak zinga ṭha ber, Book of the Year atan an thlang a ni.