Covid-19 vei mi 3 thih belh

Nimin khan State Referral Hospital (ZMC)-a Covid-19 vei enkawl lai mi pathum an thi. Zing dar 3:25-ah Z Lalzidinga (78), Saron Veng, Aizawl a thi a; tlai dar 3:45-ah Chawngluaia (85) h/o Dotluangi, Chhinga Veng a thi a, tlai 4:45-ah Malsawmsangi (37) w/o Vanlalrintluanga, Zokhawthar, Champhai district a thi bawk.

Sorkar thuchhuaka a lan danin, Lalzidinga hi hripui vei nia rinhlelh a nih avangin May 14, 2021-ah SRH-ZMC-ah dah luh a ni a, a tûk May 15-ah Covid-19 positive a ni tih finfiah a ni. Sorkar chhinchhiah danah Mizorama Covid-19 vei thi 36-na a ni a, nimin chawhma dar 10 khan Saron Veng Recreation Centre-ah vui a ni.

Nimin tlai dar 3:45 khan Covid-19 vei hmuh thar Chawngluaia (85), Chhinga Veng chu an inah a thi a, Covid-19 positive a ni tih nimina hmuh chhuah chauh a nih avangin dam­dawi-inah lak hman a ni lo.

Chhing Veng LTF Chairman hnen aṭanga thu dawn danin, Chawngluaia hi ina inkhung lai a ni a, vawiinah an inah vui a ni ang. Amah hi zunthlum, thisen sang leh lung ṭha lo nei sa a ni.

Nimin tlaia thi Mal­sawmsangi (37), Zokhaw­thar hi Covid positive a ni tih May 12-ah hmuh chhuah a ni a, Champhai CCC-a enkawl a nih hnuah May 21 khan SRH-ZMC-ah dah luh a ni. Covid-19 vei thi 38-na a ni a, nizan khan Zokhawthar panpui niin, vawiinah vui a ni ang.