Ram hruaitute an bial tan an che chhuak

Covid-19 hripui léng leh inkhârkhip avangin ram hruaitute chu an bial chhungah ṭanpuina leh chhawmdawlna hna thawkin an che chhuak mek zel a; May 29, Inrinni pawh khan mi eng emaw zatin ṭanpuina an pe.

Home minister Lalchamliana chuan a bial Hrangturzo constituency chhunga Keiṭum khuaa community covid care centre mamawh hrang hrang - buhfai, dailuah, kut tihfaina, hmai tuamna, kutkawr leh vitamin C ṭhahnem tak a pe a; Covid-19 vei mekte chu an dam leh thuai theih nan duhsakna a hlân.

Minister of state Dr K Beichhua chuan Inrinni khan a bial, Siaha khawpuia veng hrang hranga VTF duty-te a tlawh a, VTF 22 hnenah MLA fund aṭangin mi harsate chhawmdawlna tur Rs. 10,000 ṭheuh leh MTP Gen.Hqrs hnenah Rs. 10,000 a pe a ni.

Minister of state TJ Lalnun­tluanga pawhin May 29, Inrinni khan a bial, Champhai South chhunga Covid-19 contain-ment area-a puan mek Zokhawthar hnenah chhawmdawlna chi hrang hrang - tél, dailuah leh neutrela eng emaw zat a pe a, VTF hnenah Rs. 10,000 a pe bawk.

Lengteng bialtu MLA L Thangmawia chuan a bial chhunga Covid-19 avanga restricted area-a puan Mimbung khuaa damdawi-inah May 28, Zirtawpni zan khan hripui laka invenna hmanraw chi hrang hrang a thawn a; Sialkal Range Development Council (SRDC) area huam chhung khaw pangaa VTF-te hnenah kut tihfaina, hmai tuamna leh kutkawr eng awm zat a pek bakah, Mimbung VTF hnenah silpauline, kut tihfaina, hmai tuamna, kutkawr leh Rs. 10,000 a pe a ni.

Lawngtlai East bialtu MLA H Biakzaua chuan a bial chhunga veng pariat - Electric Veng, Lawngtlai-III, Bazar Veng, New Vengpui, Lawngtlai Vengpui, Council Veng, Bethel Veng leh Chandmary VLT-te hnenah Rs. 45,000 ṭheuh leh Central Young Lai Association (CYLA) hnenah Rs. 20,000 a pe bawk.