Sumdawngte'n CS-ah ngenna an thlen

Mizoram Business Coordination Committee (MBCC) chuan tun hnai khan Chief Secretary hnenah lehkha thawnin, total lockdown vanga harsatna an tawhte an thlen.

MBCC chuan, Covid-19 avangin harsatna tuartu bika an inngaih loh thu tarlangin, "Ram pumpuiin kan tawrh vek karah Mizorama sumdawng pawl hrang hrang pawl 50 vel inzawm khawm MBCC chuan hripui laka kan him theih nana sorkar rorelte zah tak chungin kan member-te harsatna tawh mek hi ngawihpui theih a nih loh avangin ngenna kan rawn siam a ni," an ti.

Harsatna hrang hrang avangin thawktu sing chuang hlawh pek theih loh an hmabak a nih thu tarlangin MBCC chuan, "Hei hi sorkarin min hriatpui kan duh tak zet. Sorkar aṭanga eng emaw ruahmanna siam a nih loh chuan harsatna lian zawk leh duhawm lo zawk tâwk thei kan nih avangin ruahmanna min siamsak turin kan ngen che a ni," an ti a; an thu thlen tihlawhtling ngei turin an ngen a ni.

MBCC thu thlen tlangpui
# MBCC hnuaiah chhungkaw 10,000 chuangin eizawnna leh innghahna, an tana ding an ni tih an tarlang. Chhungkaw sing chuang innghahna sumdawnna kaihhnawih leh a nghawng tur rorelnaah MBCC-in aw an neih ve theih nan ruahmanna siam turin
an ngen.
# Covid-19 avangin kum 2020-ah ni 100 chuang leh 2021-ah ni 30 zet sumdawnna kalpui theih a ni tawh lo a, harsatna lian tak an tâwk chho mek.
# Thla tin dawr leh kudam luah man leh thawktute hlawh pek a ngai a, thla tin sumdawnna atana loan pûk rulh ngai an awm bawk.
# City bus, maxicab, taxi leh two wheeler taxi leh a dangte hmanga eizawngtute'n driver leh conductor hlawh an pe reng a, motor dahna (garage) fee chawi reng a ngai.
# Loan lâkte bank-in a ngaihdam theih loh avangin motor loan rûl thei lote motor chhuhsak/mansak an awm tawh a, chhuhsak/mansak hmabak an awm nual.