Hnahthial N-I VTF-in sawifiah

Mizoram Truck Driver Association (MTDA)-te'n an member-in Hnahthiala village task force-te kut a tuar nia an sawi chungchang chu May 29, Inrinni khan Hnahthial North-I VTF chuan thuthar thehdarhtute kâwmin an sawifiah.

Hnahthial North-I VTF chairman PC Vanlalliana chuan, hripui léng avangin chhùn zàn zawmin Hnahthial hmàr lam kawtchhuah Kâwnpuiah an duty ṭhin thu a sawi a, "Duty-te hian khualzin leh driver-te harsatna phâk ang tâwka ṭanpuiin, an mamawh hrang hrang kan ngaihtuahsak ṭhin. VTF-te leh buhfai phur motor MZ01 T-1777 driver Lalbiakdika te chungchangah thu dik tâwk lo vawrh darh a ni hi pawi kan ti hle," a ti.

Hnahthial North-I VTF chairman PC Vanlalliana chuan, May 26, 2021 tlai khan Lalbiakdika leh a ṭhiante'n VTF hnenah Supply kudam thlenga tlân tlang an dil thu sawiin, "Zana unload a rem loh thu leh khaw chhungah riah a rem loh thu lo hriattir an ni. Hnam dang driver-te pawh an awm nual avangin tuallaia chhuak mai mai lo tura hrilh an ni," a ti a; duty-te'n eirawngbawlna leh tui chawina tur tuikhur awmna thlengin an hrilh thu a sawi.

May 27, Ningani tukṭhuan ei khamah kudam pantir an nih thu sawiin PC Vanlalliana chuan, "A thil phurh a unload zo haw lam chu VTF duty post pawh engahmah ngai loin chak takin a tlân tlang a, hrui zam leh plastic parapet pawh thui tak a hnûk a ni. Traffic police leh VTF duty-ten ûm zuiin, kawnga hnathawkte'n an lo dan avangin an nangching a ni," a ti.

Hnahthial N-I VTF Chairman sawi danin, thil awmzia sawipui an tum a, Lalbiakdika chu motor aṭangin a chhuk duh lo a, a hnuah VTF duty post-ah an hruai phei a ni. Traffic rules a bawhchhiat avangin pawisa cháwi tur a ni a, pawisa a neih loh avangin traffic police-te'n ngaidamin an chhuahtir a ni.

Thil thleng chung­changah Lalbiakdika chu MTDA-ah dâwt hmangin a zualko nia sawiin PC Vanlalliana chuan, "A dikna lam ringawt changchawia VTF tihmualpho a tumna hi kan dem a, thu dik chanve pawh tling lo hmanga MTDA leh Zoram mipui hmuha a zualko hi ṭha kan ti lo a, Hnahthial North-I VTF hnenah thupha a chawi ngei kan phût a ni," a ti.

Tarlan tawh angin, MTDA chuan, Hnahthial dáia Lalbiakdika chunga task force duty-te chet dan avangin, kutthlaktute'n MTDA lungawina tâwka ngaihdam an dil a nih loh chuan Hnahthialah buhfai dah an tum tawh loh thu May 28, 2021 khan an puang a ni.

Hetih lai hian, Mizoram Tipper Association Drivers & Owners leh Ashok Leyland Tipper Association chuan thuchhuah siamin, MTDA an thlàwp thu an tarlang a ni.