Golgotha Camping Centre-a awm Mi 100 zinga 39-in hripui an vei

May 29, Inrinni khan Vairengtea ruihhlo ngaite enkawlna hmun, Golgotha Camping Centre-a awm mek zingah Covid-19 vei mi 39 hmuh chhuah a ni a, Covid positive rih lote ni 10 hnuah sample endik leh tum a ni.

Thu dawn danin, Golgotha Camping Cen­tre-a awm zinga Covid-19 positive mi 39-te chu mipa 37 leh hmeichhia pahnih an ni a; a naupang ber chu nausén thla 4 mi niin, a upa ber chu kum 67 mi a ni. Hmeichhia pahnih chu Jordan Centre CCC, Seṭhawnah hruai an ni a, mipa zawng chu Polytechnic CCC, Bualpuiah enkawl zui an ni thung.

Vanglaini zawhna chhangin Vairengte VC president Lalfamkima chuan, Golgotha Camping Centre-ah hian mi 100 an awm mek a, an zingah Covid-19 symptom nei an awm nual avangin Kolasib DC ruahmanna angin RAT hmangin an vaiin an swab sample endik a nih thu a sawi.

Vairengte VCP sawi danin, Golgotha Camping Centre-a awm mi 100 zinga RAT-a negative mi 61-te chu ni 10 hnuah sample endik leh tur a ni a; hripui vei hmuh tawh mi 39-te nen inkungkaihna nei vek an nih avangin centre leh a chhehvel chu containment zone-ah puan a ni a, mi dang dah luh belh theih a ni rih lo.

Zawhna chhangin Lalfamkima chuan, Vai­rengte thlang Assam state chhunga ruihhlo lak tuma kal an awm ve deuh reng thu leh a tam ber chu Kolasib district-a mite an nih thu a sawi a; chu'ng mite chu police lamin an lâk loh avang leh court lamin an thubuai a ngaihtuah tawh rih si loh avangin Golgotha Camping Centre-a awm an tam phah thu a sawi bawk.