Lirthei hman man sorkarin a la ba nual : Health deptt-in Rs. 24,91,016 a la bá

Covid-19 kaihhnawiha sorkarin Kolasib district-a lirthei chi hrang hrang a hmansakte hnenah hman man pek loh a la awm nual a; sorkarin a pek har avangin an mangang tawh hle tih lirthei neitute chuan an sawi.

Lirthei hman man hi Health department-in a pek tur lirthei 29 hman man cheng nuai 24 chuang a la awm a, Disaster Management & Rehabilitation (DMR) department-in an pek tur eng emaw zat a la awm bawk. Pawisa chu Finance-ah ngaihtuah nawn turin a awm mek nia thu dawn a ni.

Vanglaini palaiin a biak kualnaa Kolasib district-a lirthei neitu ṭhenkhatte sawi danin, Lengpui Airport aṭanga Kolasib district-a haw tur te, Kolasib district chhunga quarantine centre-a khualzinte phurh kualna atan te, Covid-19 positive-te phurh kualna atante sorkarin an lirtheite a hmansak a; chu'ng atan chuan May 30, 2020-ah inremna an ziak.

Inremna pathum ziah a ni a, inremnaah chuan lirthei neitute leh Kolasib district-a sub-deputy commissioner leh Kolasib District Task Group on Commodities & Transport nodal officer-in hming an ziak. Inremna angin, lirthei hman man chu Health department-in a pêk tur leh DMR department-in a pek tur ṭhen hran a ni.

Health department-in a pek turah January 28, 2021 thleng khan lirthei 29 hman man Rs. 24,91,016 pek a la ni lo. An la bat zingah maxicab pakhat hman man Rs. 4,25,250 leh a dang pakhat hman man Rs. 4,24,585 chu bat tam berte a ni a; cheng nuai khat aia tam batsak lirthei pasarih a awm. Batsak tlem ber chu Rs. 7,000 a ni a, Rs. 9,590 batsak pakhat a awm bawk.

Bus hman man Health department-in a la batsak zinga pakhat chuan, Lengpui Airport-a khualzin hawte a phurh laiin, Vairengtea screening point-ah Covid-19 positive hmuh chhuah a nih avangin hripui veite a phur ṭan tih a sawi. Hripui veite phurtu a nih avangin mipuiin an ṭih hle thu te, chaw eina tur pawh an hriat loh thute leh harsatna an tawh fo thute a sawi a; an manganna sorkar hotu pakhat hnena an thlenin, chhànna an dawnin an rilru a tina hle niin a sawi bawk a ni.

Hemi chungchangah hian Kolasib DC Dr H Lalthlangliana chuan zawhna chhángin, an tih tur chu an tifel vek tawh a, sorkarah an thehlut vek tawh tih a sawi a, "Engkim kan tifel vek tawh," a ti.

DMR leh Home changtu secretary Lal­biaksangi chuan zawhna chhangin, "State Executive Committee chuan kumin February thla khan Covid-19 kaihhnawiha DC-te bill bá hi pek vek ni rawh se, tiin kan rél tawh a, Aizawl DC-ah hian cheng nuai 81 vel a ni a, a thlen chin sawi mai a harsa rih," a ti a; Treasury-ah K-deposit-in a la táng a nih theih thu a sawi.

Health department-in Kolasib district-a lirthei 29 hman man a la bat chungchangah hian Health department official pakhat chuan, "Sawi theih hnuhnung berah chuan Finance a thleng tawh. Finance department hian observation an rawn nei a, hemi avang hian May 10-ah Directorate of Health Services (DHS)-ah kan thawn leh tawh a, hei hi DHS-in min rawn chháng leh ang a, an rawn chhàn dan ang hi Finance-ah kan thawn leh ang," a ti.