SRH-ZMC hnenah thilpek pe

D-3 Enterprised neitu Dr Lalmalsawma Nghaka, Congress ṭhalai president leh Mizoram PWD Engineering Service Association (MIPESA) chuan nimin khan Zoram Medical College (ZMC) hnenah thilpek eng emaw zat an hlân.

MPYCC president Dr Lalmalsawma hian LG air conditioner leh Haier washing machine a pe. Dr Lalmalsawma chuan, LG company-a CSR team-te a bia a, Mizoramin Covid-19 a donaah ṭanpuina pe tura a ngen thu sawiin, "Tunah hian Mizoram sorkara mithiamte nen LG company lamte inberáwn mekin, LG company-in Covid-19 dona kawngah Mizoram sorkar mamawh rawn pek an inhuam a ni," a ti.

MIPESA-in ZMC hnena thilpek an hlante chu refrigerator (litre 188) paruk, air conditioner (ton 1.5) pakhat, dryer pahnih, washing machine (kg. 7) pahnih, aqua water filter paruk, rice steamer pakhat, air mattress 15 leh wall fan 12 a ni a; an thilpek zawng zawng hi Rs. 4,82,460 man a ni.