Mizorama lut hnam dang driver-te swab test tih ngei CYMA-in a duh

Central YMA chuan Mizoram páwn aṭang rawn lut hnam dang driver-te chu Covid-19 an vei leh vei loh hriat nan swab sample endik ngei turin sorkar thuneitute an ngen a; hemi chungchangah hian nimin khan sorkarah ngenna an thehlut.

Nimin vek khan CYMA office bearer-te chuan Zoram Medical College an tlawh a; ZMC bawlhhlawh paihna hmun chu mihring leh nungcha dangte hriselna atan pawi thei a nih avangin ruahmanna thar siam turin thuneitute an ngen.

CYMA hruaitute hian nimin khan Ṭawngṭai Bethel Camping Centre, Sakawrtuichhun an tlawh bawk a; centre-a in pakhat, Pathiannia kâng chu enfiahin, in sak leh dan tur an sawipui. CYMA chuan TBCC-a in pakhat kâng ṭanpuina a remchan dan anga pe turin Aizawla YMA branch-te an ngen a ni.