Press accreditation card thar inhlân
Information & Public Relations (IPR) director Lallianpuii chuan nimin khan a pisaah Mizoram Journalists’ Association (MJA) general headquarters president Zonunsanga Khiangte hnenah press accreditation card thar a hlân.
Lallianpuii chuan, Covid-19 hripui léng karah hun harsa tak hmachhawn mek ni mah se, sorkarin media a ngaih pawimawh avangin press accreditation card-te chu peih theih hrâm niin a sawi a, "Press accreditation hi kum hnih chhung a nung a, tlai lo tura chak taka hmalak a ni chungin lockdown puan a nih avangin a hun takah tihchhuah theih a ni lo a, a pawi hle," a ti a; accreditation chuan hamṭhatna lian tham keng lo mah se, journalist nazawng hnenah sorkarin a pek loh avangin a hlut thu a sawi.
Accreditation card chu media mite tan identitity card nih a tlin thu sawiin Lallianpuii chuan, "Khawvel hriatah pawh sorkar hriatpui ngeia accredited journalist nihna chuan zahawmna a keng tel. MJA lam pawhin journalist-te zingah mahni accreditation card dik lo taka hmang emaw, dan phal loh thilah inhnamhnawih emaw an awm a nih chuan a rang lamin inhriattir ang u," a ti.
IPR Director chuan, press accreditation card chu sorkara nodal department IPR chuan tehfung hrang hrang hmangin uluk taka a pek thu a sawi a; tun hnaia Real Life MIZORAM Youtube channel-te'n ‘social media card’ nei anga an insawi chu khawi establishment aṭang maha pek chhuah theih loh, awmze nei lo a nih thu leh an chhui chian mek thu a sawi bawk.
MJA president Zonunsanga Khiangte chuan, IPR leh MJA inkarah thawhhona ṭha chhawm nung reng turin theihtawp chhuah zel a pawimawh thu a sawi a, "Lockdown boruakah media mite tan ni tin awrh chhuah ngai a nih avangin press accreditation card thar hi kan nghakhlelh hle a, IPR-in hri lêng karah beisei aia rangin a thar min siamsak thei hi a vanneihthlak hle a ni," a ti.
Press accreditation card thar hi kum 2021-23 chhung nung tur a ni a; nimina sem chhuahte chu Aizawl district-a mite chauh a ni rih a, hripui léng boruak a ziaawm hunah district dangah thawn chhuah a ni ang.