District-te'n inkaihhruaina thar an siam

Lunglei, Champhai, Serchhip, Lawngtlai, Khawzawl leh Hnahthial district-a sorkar hotute chuan total lockdown chhunga an district-a hman tur inkaihhruainate nimin khan an siam. Inkaihhruaina thar chu ṭha taka zâwm turin an district mipui an ngen.

Lunglei DC Kulothungan A kaihhruaiin District Task Force member, VC Association leh VTF hruaitute'n Lunglei district-ah Covid-19 a darh zel loh nan inkhuahkhirhna khauh zawka kalpui an rél. Lunglei khawpui chhungah CCCC pathum a awm a, Covid-19 vei mi 170 an awm mek a ni.

Meeting chuan, Chief Minister’s Relief Fund (CMRF) aṭanga mi harsate ṭanpuina tur Rs. 5,00,000 an dawn chu hripui léng vanga harsa tawk leh chhuanchham mai theia ngaih chhungkuate hnenah Rs. 1,000 ṭheuh pek ni se, an ti a; ṭanpuina hi bialtu incident commander leh VTF-te sem turin an dah.

Champhai District Disaster Management Authority (DDMA) chu an chairman Maria CT Zuali, bawrhsap hoin an ṭhukhawm a; hripui léng dona kawnga hmalakna hrang hrangte chu ṭha thawkhat viaua hriat a nih thu tarlan a ni.

Ṭhutkhawmah hian, ramri kaltlanga hri inkai darh thei laka fimkhur a ṭulzia leh hmalak theih dan turte sawiho a ni a; district páwn lam aṭanga an district-a lut turte uluk taka vil zui a, inkaihhruainate ṭha taka kenkawh zel ni se, an ti.

Serchhip District Disaster Management Authority leh district chhunga mi pawimawhte chu DC pisa meeting hall-ah additional DC Lalmuansanga Ralte hoin an ṭhu khawm a, inkhuahkhirhna kalpui dan tur an siam a, inkaihhruaina (SoP) thar an tichhuak nghal.

Lawngtlai DC Dr Andrew H Vanlaldika hoin inkhuahkhirhna kalpui dan tur rèl a ni a; auto-rickshaw leh taxi-te chu awmze neia tlân an remti a, maxicab-te erawh chu Mizoram puma inkhuahkhirhna kalpui mek a nih avangin la tlân rih lo turin an ti. Lawngtlai district-ah hian Covid-19 vei mi 242 an awm mek a ni.

Khawzawl DC Zothanmawia hoin sorkar hotute chuan an district-a inkaihhruaina leh a kaihhnawih thil chi hrang hrang nimin khan an siam. Khawzawl district-ah hian Covid-19 vei mek mi 12 an awm a, khung hran mek chhungkaw 100 chuang an awm.

Hnahthial District Task Force on Covid-19 leh VTF hruaitute chu an chairman H Dolianbuaia, bawrhsap kaihhruaiin an ṭhukhawm a, Covid-19 donaa hmalakna hrang hrang an thlir lêt bakah, ruahmanna thar an siam.

Hnahthial district-ah hian Covid-19 vei mi 93 enkawl theihna tur covid care centre (CCC) pathum a awm a, CCCC erawh a la awm lo. Meeting chuan CCCC din a nih theih nan hmalak nghal an rél a ni. Hnahthial district-ah hian Covid-19 vei mi 25 hmuh a ni tawh a, vei mek erawh an awm lo thung.