KHAWTHLIR
Thisen pe
Nimin khan BJP ST Morcha chuan Civil Hospital, Aizawl Blood Bank-ah thisen unit 24 an pe a, petute mipa 21 leh hmeichhia pathum an ni. Kolasib District Sports Association (KDSA) chuan District Sports Committee hmalaknain District Hospital-ah nimin khan thisen unit 15 an pe a, petute mipa 12 leh hmeichhia pathum an ni. KDSA hian nimin aṭanga June 10, 2021 thleng thisen pek rûnpui an nei dawn a, nimina petute chu Amateur Taekwondo Association leh Chess Association-te an ni.
Kawng enfiah
Minister of state Dr K Beichhua chuan nimin khan a bial Siaha huam chhunga Noaotla leh Chakhei inkar kawngpui siam mek a enfiah a, contractor-te chu hna ṭha taka thawk turin a chah. Minister hian Lobo khua aṭanga Hakha, Myanmar thleng kawngpui sial tur pawh a enfiah nghal a; kawng sialna atan NEC aṭangin cheng nuai 5021 ruahman a ni a, tender chhuah a ni tawh.
ZORO-in ngen
Zo Reunification Organisation (ZORO) chuan, Myanmar sipaite kut aṭanga Mindat chhan chhuak turin United Nations Organisation an ngen a; May 28, 2021 khan UNO hnuaia United Nations Permanent Forum on Indigenous Issues (UNPFII) leh United Nations Human Rights Commission (UNHRC) hnenah ngenna lehkha an thawn a, mi pawimawh dangte hnenah a copy an pe bawk.
CM-in ṭanpuina
Chief minister Zoramthanga chuan, Covid-19 léng vanga harsatna tâwk leh inkhàrkhipa vanga eizawnna lama harsatna tâwkte puihna atan kawng hrang hrangin hma a la a; ZOHANDCO nen ṭangkawpin puanṭhui thiamte tan eizawnna ni pahin PPE ṭhui mek a nih thu sorkar thuchhuahin a tarlang. Zoramthanga'n Covid19 vanga a bial Aizawl East-I huam chhunga harsatna tâwkte hnenah ṭanpuina sum a hlan a, veng tinte tan hmanraw chi hrang hrang a pek bakah, LTF-te leh Sihphir Venghlunah CCCC dinna tur hmanraw chi hrang hrang a pe bawk.