Mi hrang hrangin ṭanpuina an pe

Minister of state Dr K Beichhua chuan nimin khan a bial chhunga Noaotla I, II leh III te, Lobo I leh II te, Chhaolo I, II leh III-a village task force-te a tlawh a, Naaotla-III VTF hnenah Rs. 5,000 leh VTF dang zawng hnenah Rs. 10,000 ṭheuh a pe. Khaw hrang hrangah hian buhfai leh Covid-19 laka invenna hmanruate a pe bawk.

Aizawl South-II bialtu MLA Lalchhuanthanga leh he bial chhunga councillor pahnih Malsawmzuala Ralte leh Baryl Vanneihsangite chuan nimin khan Tuikhuahtlang, Sikulpuikawn, Mission Veng, Model Veng, Kulikawn, Salem Veng leh ITI -venga taxi welfare-te ṭanpuina an hlan.

Dr Lalbiakmawia Ngente, Bungkawn te chhungkua chuan an venga retailer pahniha ration buhfai sem mekah containment zone-a awm Bungkawna YMA section pathum huam chhunga chhungkua zawng zawngte ration an khulsak vek dawn.

Bungkawn LTF tarlan danin, an venga YMA section pathuma awm chhungkuate chuan a thlâwnin buhfai an la ang a, a man chu a hlâwmin Lalbiakmawia Ngente te chhungkuain an peksak dawn a ni. Lalbiakmawia Ngente te chhungkua hian kumin May thla tìr khan an venga khawsak harsate chhawmdawlna turin Rs. 2,00,000 an lo pe tawh bawk.

Lunglei Higher Secondary School NSS volunteer-te pawhin nimin khan ṭanpuina chi hrang hrang an sem a; TNT, Lungleiah buhfai ip 10 an pek bakah, Chanmari, Venglai, Rahsi Veng leh Electric Veng VTF-te hnenah ṭanpuina an sem a ni.