Covid-19 vei mi 2 an thih belh May, 2021-ah mi 25 an thi

Nimin khan State Referral Hospital (ZMC)-a Covid-19 vei enkawl lai mi pahnih - R Lalrohluna (57), Armed Veng leh Lalrokimi (64), Venghlui te an thi. Nimina thite nen hian May, 2021 chhungin Covid-19 vei mi 25 an thi.

Covid-19 vei enkawl lai R Lalrohluna (57), Armed Veng chu nimin zing dar 8:30 khan a thi a, nimin vêk khan a nu leh a unaute awmna Selingah vui a ni. Zunthlum nei sa niin sorkar thuchhuakin a tarlang.

R Lalrohluna hi Police inspector a ni a, kumin March-April chhunga West Bengal Assembly inthlanpuia Mizoram police aṭanga duty zingah a tel. West Bengal aṭanga an rawn haw hnuah 4th IR hmun, Rengdilah inthlana duty dangte nen an inkhung a, Covid-19 positive a ni tih May 3, 2021 khan hmuh chhuah a ni a, Mamit CCC-a enkawl a nih hnuah May 5 khan SRH-ZMC-ah sawn a ni.

R Lalrohluna ruang hi Armed Vengah rei lo tê chawlhpui a nih hnuah Seling panpui a ni a, Seling hi chhun dar 1 velah thlenpui niin, vui nghal a ni.

Nimin tlai dar 3:30 khan Lalrokimi (64) w/o R Lalengmawia (L), Venghlui chu SRH-ZMC-ah a thi a, vawiinah vui a ni ang.

Thu dawn danin, Lalrokimi hi Covid-19 positive a ni tih May 15 khan hmuh chhuah a ni a, Durtlang BSUP CCC-a enkawl a nih hnuah May 18 khan SRH-ZMC-ah dah luh a ni. Amah hi chuap ṭha lo nei sa a nih thu sorkar thuchhuakin a tarlang.

Mizorama Covid-19 vei thi hmasa ber Lalsangkhuma, Dawrpui chu October 28, 2020-ah a thi a, nimin thleng khan mi 40 an thi tawh. Nikum 2020 khan mi pariat an thi a, kumin 2021-ah mi 32 an thi tawh a ni.

Kumina thi mi 32 zinga mi 25 chu May thlaa thi an ni a; kumin January, February leh March thlaah mi pakhat ṭheuh an thi a, April thlaah mi pali an thi a ni. Hripui vei vanga enkawl laia thi mi pahnih erawh chu Covid-19 vei thi zingah chhiar tel an ni lo.