MRB-in cheng vbc. 38.55 an hlêp

Mizoram Rural Bank (MRB) chuan financial year 2020-21 chhungin cheng vbc. 38.55 an hlêp a, financial year hmasa 2019-20 chhunga an hlép cheng vbc. 13.32 aṭangin 189.53%-in a tam zawk.

MRB Board of Directors chu tun hnai khan an ṭhukhawm a, April 2020 - March 2021 chhunga an sum dinhmun, Bank Statutory Auditor-in an endik (audit) tawh chu an thlir a, an pawm a ni.

MRB tarlan danin, kum 2020-21 chhunga deposit an dawn zawng zawng chu cheng vbc. 4,154.87 a ni a, kum hmasa aiin vbc. 676.75 (19.46%)-in a tam zawk. Operating profit chu vbc. 106.56 a ni a, kum 2019-20 ah vbc. 92.44 aiin 15.27%-in a tam. Loans & advances (pek chhuah) cheng vbc. 2052.14 an nei a, kum 2019-20 chhunga an pek chhuah aiin cheng vbc. 516.71 (33.65%)-in a tam zawk.

Financial year 2020-21 tawpa bank total business chu cheng vbc. 6,207.01 a ni a, kum hmasa aiin vbc. 1,193.45-a pungin, a punna rate chu 23.80% a ni. Total business-a MRB ṭhanna chu Mizorama bank awm zingah a sang ber niin an tarlang.

MRB hian kum 2020-21 chhungin corporate social responsibilty (CSR) atan cheng nuai 11 an hmang a; Marpara, Farkawn, Saitual leh Thingdawlah branch an hawn belh.MRB hi Regional Rural Bank Act, 1976 hmangin September 27, 1983-ah din a ni a, share neitu pathumte'n share an neih dan chu - sorkar laipuiin 50%, Mizoram sorkarin 15% leh State Bank of India-in 35% a ni. Mizorama district 11 leh RD block 26-ah branch 89 an nei a, bank zinga branch nei tam ber an ni.

MRB 2020-21 dinhmun
Deposit account zat - 9,53,497
Loan account zat - 67,138
Branch awm zat - 89
MRB staff zat - 440