Kolasib district-a ram kâng véng ṭha ber Thingthelh khua

Kolasib District Fire Prevention Committee chu nimin khan an chairman Dr H Lalthlangliana, bawrhsap kaihhruaiin DC conference hall-ah an ṭhu a; kum 2021-a an district chhunga kângmei vèn kawnga hma la ṭha berah Thingthelh khua an thlang.

Dr H Lalthlangliana chuan, kumina Mizoram district hrang hranga kângmei nasa tak a chhuah thu sawiin, "A pawi tak zet. Kolasib district hmun ṭhenkhata kângmei chhuakte erawh chu sorkar leh khawtlang thawhhona zarah rang taka ṭhelh mih a ni," a ti.

Kolasib DFO N Viji tarlan danin, kuminah Kolasib district-ah ram kâng 361 report dawn a ni a, FSI report-a a lan danin, ram hectare 323.71-a zau a kâng a, chu'ng zinga hectare 307.41 chu lo hâl a ni.

Kum 2021 ṭhál chhunga ram kâng vên kawnga hma la ṭha khua thlan chhuahna atan hian tehfung hrang hrang hman a ni a, pakhatna Thingthelh khuain Rs. 50,000 an dawng a, pahnihna Khàmráng khuain Rs. 30,000 leh pathumna North Chhimluang khuain Rs. 20,000 an dawng.

Meeting-ah hian June 11, 2021-a Green Mizoram Day puala thing phun hnatlang neih dan tur an rél nghal a; Kolasib Saidan field-ah Green Mizoram Day hawnna buatsaih an rél a ni.