MZU hnuaiah online exam ṭan a ni

Mizoram University (MZU) hnuaia under graduate leh profe­ssional course ṭhenkhat exam chu nimin khan online hmangin ṭan a ni a, June 28, 2021 thleng a awh ang.

MZU aṭanga thu dawn danin, online exam-ah hian zirlai 24,000 velin exam an hmachhawn dawn a, tluang taka exam neiha zawh a nih theih nan theihtawpa zirlaite lo ṭanpuia thawhpui turin MZU chuan mi tin an ngen.

Online exam hian ken tel tam tak a nei tih tarlangin MZU chuan, "Chu'ngte chu internet signal neih ṭhat te, zirlaite'n an exam paper an ziahna tur hmanruate a ni," an ti.

MZU controller of examinations Prof. Lalnuntluanga chuan, hripui léng vanga inkhàrkhip laia Central YMA bakah, YMA group leh branch-te'n an huam chhunga zirlaite hmakhua ngaia theihtawp an chhuah chu lawmawm a tih thu a sawi a; DMR department, task force, MZU Student’s Council, MZP, MSU, Principal Council leh MCTA-ten theihtawp an chhuahnaah lawmthu a sawi bawk.

Online hmanga exam hma­chhawn tur hian Siaha district-a Mawhrei khuaa zirlaite chuan an khua aṭanga km. 5 a hlá, internet signal ṭhatna hmunah nimin khan an exam ṭan.

Vanglaini-in thu a dawn danin, Mawhrei khuaah hian internet signal awm tho mah se, online exam hmachhawnna tur khawpa chak ṭha a ni lo. An khua aṭanga km. 5-a hláa tlang pakhatah 4G signal an man ve thei a, chu tlangah chuan Mara Students Organisation (MSO), Mawhrei branch-in an khuaa zirlaite exam-na turin bûk an sa a ni.

Mawhrei khua hi Tipa (Tuipang) RD block chhung, Mizoram leh Myanmar inrìna hnaihah awm a ni a, Aizawl leh Siahaa college kal lai zirlai 10 vel an awm a ni.