Rawmi tender mi 4-in an chháng : A ṭiak supply tur 2,90,000 an nei
Horticulture department-in May 7, 2021-a Rawmi (Dendrocalamus Sikkimensis) ṭiak supply-tu tur a zawnna tender chhangtute chhànna chu nimin khan hawn a ni a, mi paliin an chháng. Mi palite'n Rawmi ṭiak supply tur an neih zat chu nuai 2,90,000 a ni.
Tender hi nimin chhun dar 12 thleng khan thehluh theih a ni a, chhànna lutte chu nimin vek chhun dar 1 vel khan hawn a ni. Nimin bikah hian technical bid chauh hawn a ni a, chhànna lut zawng zawng pawm a ni.
Vawiin hian financial bid hawn leh a ni dawn a, chuta pawmte chu National Bamboo Mission hnuaia accreditation board-in an nursery endikin, Raw-mi ṭiak supply-tu tur thlan a ni ang. Rawmi supply-na tur tender chhángtute chu Mizoram Bamboo Producer (Secondary Hardening Unit, Growmore Biotech), IMCS Nursery Firm, Bairabi Bamboo Producer leh King Industry-te an ni.
Raw chi supply tur hi Socio Economic Development Policy (SEDP) leh National Bamboo Mission (NBM) hnuaia area expansion scheme atan a ni a; raw chi SEDP hnuaiah 15,000 leh NBM hnuaiah 25,000 supply tur a ni.
Rawmi ṭiak supply tur chu a hrisel ṭha tur a ni a, centimetre 30 aia hniam lo tur a ni. Inpêk chhàwnna velah a chhia a awm chuan a thlàwnin a supply-tute'n an pek leh a ngai dawn.
Tarlan tawh angin, eptu party-te chuan Covid-19 avanga sum harsat laia Rawmi supply-tu tur zawn chu a hun loah an ngai a, tender chhuah tawh pawh sût (cancel) ni se an duh thu an lo tarlang tawh.
Horticulture department hian June 3, 2020 khan mau/ raw ṭiak supply-na tur tender a lo chhuah tawh a, chumi ṭum chuan Dendrocalamus Brandisi leh Dendrocalamus Latiflorus ṭiak supply-tu tur zawn a ni. Tender chu chhángtu pakhat chiah a awm a, chhángtu awm chhun Growmore Biotech chu supply-tir a ni.
Dendrocalamus Brandisi leh Dendrocalamus Latiflorus ṭiak supply tura thlan Growmore Biotech hian an authorised distributor F Lalhriatpuii, Ramhlun South hmingin an chháng a, F Lalhriatpuii hi rawmi supply tender chhángtu zinga mi, Mizoram Bamboo Producer neitu a ni. Growmore Biotech Ltd., Tamil Nadu director chu Dr N Barathi a ni.
Hetih lai hian Horticulture department chuan thuchhuah siamin, Rawmi supply tender chhuah chungchang an lo sawifiah tawh a; department programme awm sa aṭangin Rawmi chìnna tur vah a nih tawh thu leh Rawmi supply chu tihmâkmawha an ngaih thu an tarlang.