A thlawna vaccine pe turin PM ngen

Chief minister Zoramthanga chuan May 31, Thawhṭanni khan prime minister Narendra Modi hnenah lehkha a thawn a; kum 18-44 inkarte tana Covid-19 vaccine pek tur state sorkarin mahnia lei tura tih chu tidanglam a, thlàwna Mizoram tana vaccine pe turin a ngen.

CM Zoramthanga hian Prime Minister hnenah May 31-a lehkha a thawn thu hi Instagram-ah a tarlang a, "India ram hmun tam zawkah Covid-19 hri káiin tlakhniam lam a pan laiin, hmarchhak state-ah chuan a la pung nasa hle a ni," a ti a; hripui léng chuan ram sum leh pai a nghawng nasat thu leh state rethei Mizoram angah chuan a nghawng a nat zual thu a tarlang.

Prime Minister chu Covid-19 vaccine lei ngai chungchangah inrawlh tura a ngen thu tarlangin Chief Minister chuan, "State ngaihven ngai bik Mizoram ang chu a thlàwna vaccine pe turin ka ngen a, India sorkar lakah hemi kawnga inlungrual taka hma la turin hmarchhak state chief minister zawng zawngte pawh ka ngen a ni," a ti.