Covid-19 vei mi 2 thih belh

Nimin khan State Referral Hospital (ZMC)-ah Covid-19 vei enkawl lai mi pahnih - R Lalduhzuala (40), Lungdai leh Vanlalvuana (65), Chhingchhip te an thi a; Mizoramah hripui vangin mi 42 an thi tawh.

Covid-19 vei enkawl lai R Lalduhzuala (40) h/o Lalsangpuii, Lungdai chu nimin zing dar 7:20 khan a thi a, nimin tlai 3 khan 3rd MAP kohhran hall, Mualpuiah vui a ni.

R Lalduhzuala hi 4th IR police niin, kumin March-April thlaa West Bengal inthlanpuia duty zinga mi a ni a, an rawn haw hnuah Covid-19 positive a ni tih April 27, 2021-ah hmuh chhuah niin, May 4-ah SRH-ZMC-ah dah luh a ni.

Nimin tlai dar 4:25 khan hripui vei enkawl lai Vanlalvuana (65) h/o Saikhumi, Chhingchhip Venghlun chu SRH-ZMC-ah a thi bawk a, vawiinah vui tura ruahman a ni.

Vanlalvuana hi Covid-19 positive a ni tih May 17, 2021-ah hmuh chhuah a ni a, a tûk May 18-ah SRH-ah dah luh a ni. Zunthlum nei sa a nih thu leh cancer vangin kum 2005-a zai tâwk tawh a nih thu sorkar thuchhuahin a tarlang.

Sorkar chhinchhiah danin, nimina thi mi pa­hnihte nen hian Mizo­ramah Covid-19 vei thi mi 42 an awm ta a ni.