KHAWTHLIR

TBCC tanpui
Disaster Management & Rehabilitation minister Lalchamliana chuan May 31, Thawhṭanni khan tun hnaia kângmei tuartu Ṭawngṭai Bethel Camping Centre, Sakawrtuichhun hnenah rangva bãn (bundle) 12 a pe. Rangvate chu Minister aiawhin DMR director John LT Sanga leh joint director Lalrinawma Ṭaite ten a hmunah an pe a ni.

CMRF tanpuina pe
Covid-19 vei an tam avanga May 5, 2021 aṭanga containment zone-a puan Zokhawthar khuaah nimin khan Champhai additional DC Henry C Lalrawnkima'n Chief Minister's Relief Fund kaltlangin Rs. 1,50,000 a pe a, Zokhawthar khawtlang aiawhin YMA hruaitute'n an dawng. YMA Sub Headquarters, Champhaiin Zokhawthar khawtlang hnenah Rs. 10,000 an pe bawk.

Party-in tanpui
Mizoram Pradesh Congress Committee chuan nimin khan Zoram Medical College (ZMC)-ah ṭanpuina an hlân a, Mizo National Youth Front pawhin Operation Kingdom Ministry, Phunchawng hnenah buhfai ip 10, alu ip khat leh tél báwmpui khat an hlân bawk. Congress party hian ZMC-ah hian damlo enkawltute mamawh chi hrang hrang Rs. 70,000 chuang hù an pe a ni.

Thisen pe
Kolasib District Football Association chuan District Sports Committee ruahman angin nimin khan District Hospital blood bank-ah thisen unit 11 an pe a, petute mipa pakua leh hmeichhia pahnih an ni. Civil Hospital, Aizawl blood bank-ah mahnia a thlàwna thisen pe mi pakua an awm bawk.

SRH-ah mi 21-in Ventilator hmang
State Referral Hospital-ah nimin tlai dar 5 thleng khan Covid-19 vei mi 208 enkawl mek an ni a, ICU-ah mi 39 awmin, an zinga mi 21 chu ventilator hmantir mek an ni. SRH-ZMC Bulletibn tarlan danin, SRH-ah hian nimin khan hripui vei mi pathum an awm a, mi 21 chhuahtir an nih laiin, mi pahnih an thi. Ward hrang hrangah mi 169 enkawl mek an ni a, an zinga mi 23 chu oxygen pek mek an ni.