Covid-19 vei hmuh chhuah leh thi zat May 2021-ah a tam fál

Kumin May thla chhungin Mizoramah Covid-19 vei mi 6,268 hmuh chhuah a ni a, nikum March thla aṭanga kumin April thla (thla 14) chhunga hmuh chhuah aiin a tam zawk. Sorkar chhinchhiah angin, May thlaah Covid-19 vei mi 25 an thi a, thla dang zawnga thi tawh zat aiin a tam zawk bawk.

May 2021 chhunga Covid-19 positive hmuh chhuah mi 6,268 chu Mizorama hripui vei hmuh tawh zawng zawng 12,399 aṭangin 50.55% a tling a; kumin May thlaa hmuh chhuah zat hi a hma thla 14 chhunga hmuh chhuah aiin 137-in a tam zawk a ni.

Mi 100-199 inkar hmuh chhuah ṭum ni 13 leh mi 200-299 inkar hmuh chhuah ṭum ni 12 a awm a; mi 300 chuang hmuh chhuah ṭum ni thum a awm. Positive hmuh chhuah tlem ber ní, May 9-ah mi 73 hmuh a nih laiin, hmuh tam ber ní, May 29-ah mi 329 hmuh chhuah a ni a; ni tina hmuh chhuah zat chawhrual chu 202.19 a tling.

Kumin May thla chhungin Mizoramah Covid-19 vei mi 25 an thi a; hei hi sorkarin Covid-19 vei thi a chhin chhiah zat a ni a, hripui vei thi anga chhinchhiah loh mi pahnih an awm. May 31, 2021 thlenga Mizorama Covid-19 vei thi sorkarin a chhinchhiah zat chu 40 a ni a, May thla chhunga thi mi 25 hi thla dang zawnga thi zat belhkhawm 15 aiin a tam zawk. Kum 2020 chhungin mi pariat an thi a, kum 2021-ah May thla tàwp thlengin mi 32 an thi a ni.