Rs. 10,00,000 hù thilpek sem tawh

National Service Scheme (NSS) Mizoram State Cell chuan Covid-19 hripui tuar na veng pahnih - Saron Veng leh Chhinga Venga community covid care center (CCCC) hnenah nimin khan thilpek eng emaw zat an hlân a; hripui leng kaihhnawihah Rs. 10,00,000 vel hù thilpek an sem tawh.

NSS aṭanga thilpekte hi state NSS officer Dr Zirlianngura leh thawktu dangte'n veng pahnih local task force-te hnenah Rs. 40,000 hù damdawi chi hrang hrang leh Covid-19 laka invênna hmanruate an pe a ni.

Dr Zirlianngura chuan, Covid-19 léng avangin NSS volunteer-te'n an tih ṭhin - thisen pek, vantlang hmun tihfai, awareness campaign leh thil dangte duh angin an ti thei rih lo tih sawiin, "Chutih laiin, Covid-19 avangin chhungkaw tam takte'n ei leh bârah harsatna an tâwk a, chu'ngte chu task force-te kaltlangin NSS hmingin ṭanpuina pek mek a ni," a ti.

State NSS Officer tarlan danin, Mizoramah NSS awmna zirna-in 90 a awm a, chu'ng zinga zirna-in 70 vel chuan hripui léng kaihhnawihah an awmna khua/vengah ṭanpuina chi hrang hrang an pe tawh a, an pek tawh zawng zawng chu cheng nuai 10 vel hû a tling tawh a ni.