Aizawlah chawhrualin ni khatah tui Litre nuai 250 vel pump ṭhin a ni

Aizawl khawpui tuia châwmtu Tlawng lui aṭangin Tuikhuahtlangah chawh rualin ni khatah tui litre nuai 250 vel lâk (pump) chhoh ṭhin a ni.

Public Health Engi­neering (PHE) depart­­ment hotute hnen aṭanga Vanglaini thu dawn danin, Greater Aizawl Water Supply Scheme (GAWSS) Phase-I chu ni khata tui litre nuai 100 leh Phase-II chu litre nuai 240 pump thei tura ruahman a ni a; mahse, khawlte a hlui tawh avangin a tira ruahman ang pump theih a ni tawh lo.

PHE department hotute chuan, tui pump-na leh sem darhna hmaruate a hlui tawh thu sawiin, "Phase-I hi mi 80,000 leh Phase-II hi mi 3,00,000 vel châwm thei tura duan a ni a, mahse, kháwl leh hmanruate duhthusam a nih tawh loh avangin ni khata tui kan pump chhuah litre nuai 250 aṭanga 70% vel bâk mipui hnenah a thleng lo," an ti a; tui pipe/point leh tanky aṭanga tui pût a tam avangin 30% vel chu a luang ral tih an sawi.

Tui tam mah se tui sem darhna line (distribution line)-in duhthu a sàm tawh loh avangin mipui kham khawp sem a harsat thu an sawi a, "GAWSS Phase-III hi siam zawh a nih chuan ni khatah tui litre nuai 370 pump thei tur a ni dawn a, Laipuitlang aṭangin Aizawl hmar lam zawng a châwm dawn a ni," an ti.

GAWSS Phase-I leh Phase-II hi tui litre nuai 340 pump thei tur leh mi 3,80,000 vel châwm thei tura ruahman a ni a; chutih rualin, khawl leh hmanruate a hlui tawh avangin a tira ruahman ang tui a pump thei tawh lo. Kum 2011 chhiarpui ang chuan Aizawlah mihring 4,00,309 an cheng a ni.