Lungleia RT-PCR lab bun tum dan Health department-in an sawifiah

Health & Family Welfare (HFW) department chuan nimin khan thuchhuah siamin, Lungleiah RT-PCR laboratory bun turin hma an lâk thu an tarlang.

HFW department thuchhuah chuan, RT-PCR khawl dahna tur hmun him, ṭangkai taka hman theihna tur ‘Laboratory Block' siam tuma hmalak mek a nih thu tarlangin, "Laboratory Block hi Civil Hospital, Lunglei compound chhungah ngei dah turin ruahmanna siam a ni a, cheng nuai 780 hû detailed project report (DPR) siamin NEC-ah thehluh a ni tawh. Sanction hmuh thuai beisei a ni a, DPR-ah laboratory building bakah, hmanraw chi hrang hrang a tel nghal a ni," a ti.

HFW tarlan danin, RT-PCR laboratory-a thawk tur a tlem berah mi 10 mamawh a ni a, chuta tana sum sèn ngai tur chu kum khatah cheng nuai 32 chuang a ni. Ni tin (Pathianni tiam loin) sample 100 vel endik tura chhûtin, a bâwl hlo atan kum khatah cheng nuai 192 chuang a ngai dawn. Thawktu leh hmanrua atana sum sen zat tur chu kum khatah cheng nuai 234 aia tlem lo a ni.

RT-PCR laboratory bun a nih hma chuan Truenat Quattro khawl pakhat hmangin sample endik a ngai tih sawiin Health department chuan, "A ṭul chuan a dang, pakhat aia tam sorkarin lei belh turin hma a la mek a, Truenat Quattro hian ni khatah sample 40-45 a test thei a, pahnih a awm chuan ni khatah sample 80-90 a test thei dawn a ni," a ti bawk.

Civil Hospital, Lungleia hman turin Thoráng bialtu MLA Zodintluanga Ralte chuan June 2020 khan RT-PCR khawl a pe a, tun thlengin bun (install) a la ni lo. RT-PCR khawl chu hman theiha bun thuai turin YMA Sub-Headquarters, Lunglei chuan May 28, 2021 khan ziakin Health Minister an lo ngen tawh a ni.