Sorkar a inbuatsaih a ngai - ZPM Ṭhalai

ZPM party ṭhalaite chuan thuchhuah siamin, Covid-19 léng thawh thumna thleng palh thei hmachhawn turin Mizoram sorkar a inbuatsaih a ngai an tih thu an tarlang.

Covid-19 hripui léng thawh hnihnain India ram a nuai nasa tih sawiin ZPM Ṭhalai chuan, hripui léng thawh thumna thleng theia ngaih a nih avangin state hrang hrangte an inpuahchah mek thu leh, naupang lamin an tuar nasa tura rin a nih avangin state hrang hrangin fa, kum 12 hnuai lam neite hnenah vaccine pek hmasak turin ruahmanna an siam thu an sawi.

ZPM Ṭhalai chuan, state tam tak chu naupang, hri kai an tam hlauhthawn thilah naupang enkawlna tur paediatric intensive care unit (PICU), neonatal intensive care unit (NICU) leh sick new-born care unit (SNCU)-te an siam belh mek tih an sawi a, "Mizoram sorkar hian state dangte angin inbuat-saihna a rang lama kalpui a, muangcháng lo turin kan ngèn a ni," an ti.

Kum khat chuang Mizorama hripui a lèn hnuah pawh Mizoramin Covid-19 veite enkawlna damdawiin (designated hospital) pakhat chauh a la nei chu fel lo hlea an hriat thu sawiin ZPM Ṭhalai chuan, "Fûr kan hmang ṭan a, inkalpawhnaah harsatna tam tak a awm dawn. District khawpui tinah leh khaw hrang hrangah Covid-19 veite enkawlna tur damdawi-in siam hi tihmâkmawh niin kan hria," an ti a; a tlai hmaa hma la turin Mizoram sorkar an ngèn a ni.