Covid-19 vei hmuh zinga 68.65% Aizawl district-a hmuh chhuah a ni

Covid-19 chungchanga Mizoram sorkar thupuangtu Dr Pachuau Lalmalsawma chuan nimin khan Covid-19 léng thawh hnihnain Mizoram a nghawng dan a sawifiah a; May 31, 2021 thlengin Mizorama Covid-19 vei hmuh chhuah tawh 12,399 zinga 68.65% chu Aizawl district-a hmuh a nih thu a tarlang.

Dr Pachuau Lalmalsawma chuan, May 31 thlenga Covid-19 vei hmuh chhuah 12,399 zinga 8,512 (68.65%) chu Aizawl district-a hmuh chhuah a nih thu leh a bak zawng 3,887 (31.35%) chu district danga hmuh chhuah a nih thu a tarlang a ni.

State Spokesperson on Covid-19 chuan, Covid-19 thawh khatna March 2020 - March 2021 chhungin hri vei 6,131 hmuh chhuah a ni a, mi 11 an thi tih sawiin, "Covid-19 thawh hnihna April - May, 2021 chhungin hri vei 7,923 hmuh chhuah a ni," a ti.

Dr Pachuau Lalmalsawma chuan, lockdown a ni emaw, ni lo emaw, dawr leh punkhawm theihna hmun, sa leh chawhmeh dang leh mamawh leinaah tih tak zeta fimkhur a ṭul thu te, mi dang tlawhpawh tam loh hun a nih thu te, zûk leh hmuam leh chawhmeh insuah thlenga insûm a ngaih thu te, thil khawih làwr loh a ṭhat thu te, Covid-19 vaccine la tawhte pawh fimkhur reng a ṭul thute a sawi bawk.

State Spokesperson tarlan ṭhenkhat
# May 2021 chhungin Aizawl district-ah Covid-19 hri vei an tam ber a, Mizoram puma vei belhkhawm aṭangin 69.62% a tling.
# May 2021 chhunga hripui vei mi 6,268 hmuh chhuah zinga 49.38%-in symptom an nei.
# May 2021 chhunga positive hmuh 6,268 zinga 26% chu state páwn aṭanga rawn lut an ni.
# State pawn aṭanga lut zingah an luhna hmun (entry point)-a hmuh chhuah nghal 160 an awm.
# Zin haw zinga mi 449 chu a hnu lama hmuh chhuah an ni.
# Tun dinhmunah zin hawte aiin tualchhunga inkài chhàwnna a tam zawk.