Lungleiah RT-PCR bun a nih theih nan Mipuiin pawisa an thawh khawm mek
Civil Hospital, Lungleiah swab sample endikna kháwl, RT-PCR bun a nih theih nan Lungleia ṭhalai rual intél khawmte chuan thawhlawm thawh theihna an siam a, nimin thleng khan Rs. 1,60,000 vel a lut tawh a, thawh tum mi ṭhahnem tak an la awm.
RT-PCR bun a nih theihna atana mipuiin thawhlawm an thawh theihna tur buaipuitute zinga Secretary-in Vanglaini palai zawhna chhánga a sawi danin, tunah chuan mimal bank account an la hmang rih a, current account emaw, joint account emaw hmang turin an buaipui mek.
Pawisa thawh khawm hi kar liam ta, May 29 vel khan an ṭan a, nimin thleng khan cheng nuai 1.6 vel a lut tawh. Pawisa thawhtute chu mimal bakah, pawl hrang hrangte an ni a; chu'ng zingah chuan Lunglei khawpui chhung bakah, chhim lama khaw dang leh Aizawl aṭangte pawhin an tel. Tuna la thawh lo, thawh tur thu sawi mi ṭhahnem tak an la awm a ni.
RT-PCR khawl bun a nih theihna atana sum thawh khawm an tih chhan sawiin Secretary chuan, "Sorkar ṭanpuina turin a ni. RT-PCR khâwl bun hi tun dinhmuna chhim lam mipuiin kan mamawh em em a ni a, sorkar sum ringawt chuan a harsa palh thei a, mipui, a remchang apiangin an thawh ve theih nan remchang kan siam a ni, politics thil a tel lo," a ti.
Secretary chuan, ṭanpui ngaite puihna turin Lungleiah sum thawh khawmna tur (charity) buatsaih a ni fo tawh tih sawiin, "Chutiang deuh chuan tunah hian sorkar puih kan duh a, hetiang hi kan ruahman a ni," a ti a; an hmalakna chu an beisei ai maha mipuiin an ngaih pawimawh thu a sawi.
Lungleiah Covid-19 vei an tam sâwt hle tih sawiin Secretary chuan, "Tuna kan mamawh ber chu test chak a ni. Tunah hian sample test a chak lo lutuk a, backlog a tam hle. RT-PCR kháwl chu khawia mi pawh ni se, kan duh ber chu kan mamawh em avangin Lungleia PCR hmanga sample test theih vat a ni a, Pu Zodintluanga chungchangah kan buai lo," a ti.
Secretary chuan, Lunglei Civil Hospital-ah RT-PCR laboratory din a nih theih nan sorkarin North Eastern Council (NEC)-ah detailed project report (DPR) a buaipui nia an hriat thu sawiin, "NEC-a project siam hi a ṭha a, mahse, hun a duh rei dawn a, tuna kan mamawh tawh dan nen a inmil lo," a ti a; chutih rualin, sum thawh khawm ringawt chuan kháwl bun theih a ni dawn lo a, sorkar a chêt a ngai tho tho dawn tih a sawi.
Thawhlawm buaipuitute chuan, Truenat hmanga swab sample endik man chu a tláwm tak tak thei lo tih sawiin, "PCR hi chu test a tam poh leh test man a tláwm mai a, chu chu nakin zelah pawh miretheite leh sorkar tan a ṭha a ni," an ti.