RTPCR kháwl bunna turin In thar sak a ngai lo - Congress party

Mizoram Pradesh Congress Committee chuan, Civil Hospital, Lungleiah RTPCR kháwl bunna turin BSL-2 laboratory a awm sa avangin in thar sak a ngai lo tih an tarlang a; MLA Zodintluanga Ralte-in RTPCR khawl a pek tawh hman loh dan ringawt ngaihtuahah Mizoram sorkar an puh.

MPCC thuchhuah chuan, Civil Hospital, Lunglei (CHL) hotute'n an mamawhzia an sawi avangin Congress Legislature Party (CLP) leader Zodintluanga Ralte-in June 26, 2020 khan MLA fund aṭanga a lei RT-PCR khawl a pe tih tarlangin, "Health Minister, MNF party leh Mizoram sorkarin chhuanlam chi hrang hrang siamin RTPCR hman loh dan ringawt an ngaihtuah thung. CHL-a RTPCR hmang tur hian harsatna lian tham a awm lo," a ti.

RTPCR khawl chu BSL-3 laboratory chinah dah ṭhin ni mah se, Covid-19 avang leh mamawhna a sàn êm avangin June 2, 2020 aṭangin ICMR chuan BSL-2 laboratory-a hman a remti tih sawiin MPCC chuan, "CHL hian BSL-2 lab. a neih sa avangin an microbiologist pawhin RTPCR khawl dah chu thil harsa a nih loh thu Lunglei Ṭhalai Pawl hnenah 29.6.2020 khan a sawi," an ti a; Zodintluanga'n RTPCR khawl a pek laiin CHL-a BSL-2 lab-a dah turin ICMR-ah harsatna a awm lo tih an sawi.

Congress party chuan, May 28, 2021-a MNF party press release-in, 'RTPCR kháwl awm ringawt hian he khawl hi a hman theih tihna a ni lo a, a dahna tur laboratory building hranpa ICMR-in a pawm thlap neih phawt a ngai,' an tih chu thu dik lo hmanga mipui hruai sual tumna a nih thu an tarlang.

ZMC-a Covid-19 Testing Laboratory awmna chu in thar ni loin, District TB Centre awm sa, TB Laboratory, OPD leh TB veite enkawlna ward awmna building hman a nih thu sawiin MPCC chuan, "Falkawnah pawh building awm saa laboratory din theih a nih laia Lunglei a nih tâk avanga building thar sak kher ngai an ti hi thu belhchian dâwl lo, mipui hruai sual tumna dik tak a ni," an ti.

Falkawnah leh Lungleiah RT-PCR khawl dahna tur BSL-2 lab. a awm sa ve ve tih sawiin Congress party chuan, "Falkawna mi tuaihnúmin Covid-19 testing lab. atan hman a ni a, Lungleia mi pawh hman theih a nih reng laiin opposition MLA kháwl lei hman a ngaih dawn avangin MNF sorkar hian a hmang duh lo a ni tih hi thu dik a ni," an ti a; Lungleia RTPCR kháwl hman loha dah renga mawhphurtu ber chu Health minister Dr R Lalthangliana a nih thu an sawi.

MPCC chuan, Health Minister-in mipui hriselna aiin politics boruaka hmingṭhat a tumna leh eptu lam rêp chàr a âtchilh avangin Mizoram chhim lam mipuiin nasa takin an tawrh phah tih sawiin, "Congress party chuan pawi kan ti tak zet," an ti; mipui hriselna dinhmunin laboratory building sakna tur project thehluh a nghâk hman tawh lo tih sawiin, Lungleia BSL-2 lab. awm sa chu tuaihnûm a, RTPCR bun thuai turin Health Minister an phût a ni.