Ram hruaitute an bialah an che chhuak

Minister of state Dr K Beichhua chuan nimin khan a bial Siaha huam chhunga Tipi Ferry (Tuipui-ferry), Riasikah, Amotlah leh Thiahra khuaa village task force duty-te a tlawh a, chhungkaw harsate chhawmdawlna turin Rs. 10,000 leh buhfai quintal khat ṭheuh a pe.

Dr K Beichhua hian Tisòpi luia lei thawm ṭhat dan tur a enfiah bawk a, thawm ṭhatna turin MLA fund aṭangin Rs. 1,00,000 a ruahman. Tisopi-I&II khuaa VTF duty-te hnenah Rs. 10,000 ve ve a pe bawk.

Minister of state Robert Ro­mawia Royte chuan nimin khan a bial, Aizawl East-II chhunga local task force-te leh community covid care centre-ah ṭanpuina a hlân.

Robert Romawia hian Saron Venga CCCC pahnih leh LTF hnenah Rs. 1,50,000, Chhinga Venga CCCC pahnih leh LTF hnenah Rs. 1,50,000, Dawrpui CCCC hnenah Rs. 50,000, Tuithiang CCCC hnenah Rs. 50,000, AMC Ward-VIII CCCC hnenah Rs. 40,000 a pek bakah, Armed Veng, Armed Veng South leh Chite Veng LTF-te hnenah Rs. 20,000 ṭheuh a pe. Pawisa bakah invenna hmanrua leh infiamna hmanruate a pe bawk.

Serlui bialtu MLA Lalrinsanga Ralte chuan a bial chhunga Golgotha Camping Centre, Hope Centre leh in lama Covid-19 vanga inkhung hrang mek chhungkaw 83 hnenah ei tur chi hrang hrang a pe. Vairengte Auto Rickshaw Association hnenah Rs. 30,000 leh Bilkhawthlir Auto Association hruaitute hnenah Rs. 15,000 a pe bawk a, an member harsate ṭanpuina atana a pek a ni.

AMC Ward-XVII councillor David Zohmangaiha chuan June 1, Thawhlehni khan Republic Vengthlang CCCC-a hman turin sanitiser, fog sanitiser gun, fog sanitiser, oximeter, damdawi, steamer, hmaituamna leh disinfectant spray 12 a pe.

AMC Ward-VIII councillor Christina Roluahpuii Sailo pawhin June 1 khan a bial chhunga local task force-te leh CCCC-te a tlawh a, ṭanpuina eng emaw zat a hlân. Councillor hian Armed Veng, Armed Veng South, Chite Venga LTF-te'n an inṭâwm Horticulture Complex, Chitea CCCC kaihhnawihah LTF pathum hnenah Rs. 5,000 ṭheuh a pek bakah, hmai tuamna kut tihfaina leh hmunhma tihfainate a pe bawk.