Health Minister-in PCV a tlangzarh

Health & Family Welfare minister Dr R Lalthangliana chuan, Pneumonia laka invènna damdawi Pneumococcal Conjugate Vaccine (PCV) chu Mizoram puma a thlàwna sem turin nimin khan a tlangzarh.

Dr R Lalthangliana chuan, "PCV hi mipuiin kan ngaihhlut a, hri laka invènna awm thei ang ang lâk leh ngaih pawimawh nachâng kan hriat a ṭul," a ti a; natna hrang hrang laka him nan Universal Immunisation Programme (UIP) hnuaia vaccine-te la ṭheuh turin mipui a chah.

Tarlan danin, Pneumonia hi natna hrik hrang hrangin a thlen theih a ni a, chu'ng zingah chuan Pneumoccus natna hrikte chu naupang kum 5 hnuai lamah Pneumonia avanga dam lohna leh thihna thlentu tam ber a ni. PCV hian Pneumonia zawng zawng lakah naupang venghim vek lo mah se, Pneumonia thlentu tam ber lakah a veng thei a ni.

UIP hmang hian Mizoramah vaccine (hri danna) hi chi hrang pakua - Tuberculosis (TB), zeng hri, Hepatitis B, khawṭhalo, diptheria, pertusis (khuh hìp), tetanus, haemophillus influenzae type B, tangseh leh rubella-te pek mek a ni a, nimin aṭang khan PCV belh a ni.

PCV lak dan tur
1. Nausen thla khat leh a chanve a tlinah lak ṭan tur
2. Thla thum leh a chanveah a vawi hnihna lak tur
3. Thla kua a tlin hunah a vawi thumna lak tur a ni