RTPCR bun hun tihkhawtlai reng Hriatthiam a harsa - Lalduhoma

Zoram Peoples Move­ment (ZPM) leader Lalduhoma, MLA chuan, Lunglei Civil Hospi­tal-a RT-PCR bun hun tihkhawtlai a ni reng niin a sawi a, "Hriatthiam a harsa ta hle," a ti.

Lalduhoma hian nimin khan thuchah tichhuakin, Mizoramin tun dinhmunah RTPCR hmanga swab sample endikna hmun pakhatah chauh a neih thu a tarlang a, "Thawktute pawhin an kài ve fo avangin ṭum eng emaw zat test kalpui kawngah kan khaihlak ta fo mai," a ti a; chutiang a nih laia June 1, 2021-a Health department thuchhuahah, Lungleiah RTPCR khawl din tura hmalak mek a nih chauh thu tarlan a ni tih a tarlang.

Health department thuchhuah chu a lawmawm kim lo tih sawiin ZPM MLA chuan, "Tuna mamawh tawh leh kháwl pawh awm sa reng a nih laia harsatna leh chhuanlam dang hmanga tihkhawtlai reng a ni hi hriatthiam a harsa ta hle. Kan sorkar hian pawimawh a ti tak zet a, mipui mamawh hi a dah hmasa a nih chuan politics dahṭhain tih dan a hriat ka ring," a ti.

Lalduhoma chuan, ZPM chuan hripui donaah sorkar hmalakna an thlàwp thu sawiin, "Sorkar hi politics dahṭhaa ram mipui tana rawngbawl turin kan beisei a ni," a ti a; harsatna karah pawh a rang thei ang bera Lungleiah RTPCR bun theih a ni tih sorkarin a lantir thuai a beisei thu a sawi.

Sorkarin hripui do hna theihtawpin a chhuah tih sawiin Lalduhoma chuan, "Chutih mek laiin, eizawnna khaihlakin khua, veng leh chhungkaw tam tak chhuanchham an awm mek. Kan frontline worker-te'n hah sawi loin vawiin thlengin phunnâwina tel loin hna an thawk mek zel a, an chhuanawm tak zet a ni," a ti.