KHAWTHLIR

Thisen pe
Aizawla awm 46th Assam Rifles chuan nimin khan an hmunah blood donation camp an huaihawt a, Aizawl Civil Hospital tan thisen unit 25 an pe a, petute mipa 24 leh hmeichhia pakhat an ni.

DCA exam dawn
Mizoram State Council for Technical Education (MSCTE) hnuaia Diploma in Computer Application (DCA) first semester examination (2020 session) chu July 1, 2021-ah buatsaih a ni dawn. Hemi chung­changah hian Higher & Technical Education (Technical Wing) chuan hriattirna a tichhuak a, inbuatsaih turin zirlaite an chah a ni.

Thlalaka inelna
Kumina Green Mizoram Day pualin Environment, Forest & Climate Change department leh Mizo Photographers' Society-te chuan 'Thingphun Selfie Challenge' an buatsaih dawn a, inelnaa tel turte tan June 3-11 chhungin thehluh theih a ni ang. Result chu June 15, 2021-ah puan tum a ni.

Steam vaporizer pe
Kolasib College NSS unit-te chuan nimin khan Kolasb district-a Covid care centre (CCC) hrang hrangah Covid-19 vei enkawlte hman turin steam vaporizer 15 an pe. Steam vaporizer hi Kolasib College principal Dr C Lalmuankima'n Kolasib District Hospital medical superintendent Dr Doris Lalnunmawii Sailo hnenah a hlân a ni.

SRH ICU-ah Mi 38 an awm
State Referral Hospital-ah nimin tlai dar 5 thleng khan Covid-19 vei mi 199 enkawl mek an ni a, ICU-ah mi 38 awmin, an zinga mi 18 chu ventilator hmantir mek an ni. SRH-ZMC Bulletin tarlan danin, SRH-ah hian nimin khan hripui vei mi paruk dah luh niin, mi 10 chhuahtir an ni a, ward hrang hrangah mi 161 enkawl mek an ni.

Air cooler pe
AMC Ward No. XIV councillor Ramthanzauvi chuan nimin khan Zoram Medical College (ZMC) tan air cooler 12 a pe. Ramthanzauvi chuan ZMC-a thawktute inpekna fakin, “ZMC-a thawktute in inpekna ka hmuhin ropui ka ti a, in taksa mai ni lo, in rilru thlengin a hah hle ang tih ka ring," a ti.