Lungleia laboratory din tumin hma la mek : RTPCR bun a harsa rih - HME Director

Health & Medical Education (HME) director Dr T Lalhmangaihi chuan, tun dinhmunah Civil Hospital, Lunglei complex-a RT-PCR laboratory din chu thil harsa tak a nih thu leh Thorang bialtu MLA Zodintluanga pek RTPCR chu hman tumna a awm rih loh thu a sawi a; hetihlai hian laboratory din tumin sorkarin hma a lak mek thu a sawi.

HME Director hian nimin khan YMA Sub-Headquarters, Lunglei pisaah thuthar thehdarhtute leh Sub-Hqrs. YMA hruaitute a kâwm a; Lungleia RTPCR khawl bun tura sorkar hmalaknate sawifiahin, "Mi hrang hrangte'n hma an lak bakah YMA Sub-Hqrs-in Health Minister hnena ngenna an siam angin RTPCR khawl bun turin hmalak a ni," a ti.

Mizoram sorkarin Lunglei a vei a, a ngai pawimawh nia sawiin Dr T Lalhmangaihi chuan, "Hripui lên avangin chak taka hmalak a harsa. Lungleiah RTPCR khawl din theih a ni em tih pawh enfiah tawh a nih laiin, a taka thawktute ngei an tel loh avangin tih fuh loh deuh a awm," a ti a, enfiahtute'n hmunhma a awm tia an report chu a rintlak tâwk loh deuh niin a sawi.

Director chuan, a nih dan tur ang taka RTPCR laboratory kalpui turin Lunglei Civil Hospital-ah hmun a awm ṭha tâwk lo nia sawiin, "RTPCR khawl dah nghal mai tur hian sorkar tan thil tih a harsa. Amaherawhchu, sorkar chuan dah ngei tumin theihtawp a chhuah a, a theih lohna lam aiin a theihna lam kan thlir zel a ni," a ti.

HME Director sawi danin, Lunglei mipui harsatna tawh mek chhâwk zângkhai turin Finance department-in sum a ruahman hunah Truenat Qouttro kháwl pakhat lei belh tur a nih thu Chief Minister-in a sawi tawh a ni.

Thuthar thehdarhtute zawhna chhángin Dr T Lalhmangaihi chuan, Thorang bialtu MLA Zodintluanga'n RTPCR khawl a pek chu hman tumna a awm rih lo tih a sawi a, "Laboratory changtlung tak a awm hunah RTPCR leh a ken tel kháwl dangte chu seng luh a ni ang. Laboratory dinna atan hian NEC-ah DPR cheng vbc. 7.8 hû thehluh a ni tawh," a ti.

RTPCR chu mâwlmang taka inpek ngawt chi a ni lo nia sawiin Director chuan, "Mamawh dan leh a ṭul dangte department lama thawktute nen inráwn tlánga inpek chi a ni. Chumi hnuah chuan khâwl hralhtute'n a bun hna pawh an thawh vek a ngai," a ti a; RTPCR kháwl petu pek dan chu awmze nei lo, 'pressure cooker inpek ang' deuh mai a nih thu a sawi.

Hetih lai hian, HME Director hian May 7, 2021 khan Civil Hospital, Lunglei Medical Superintendent hnenah lehkha a thawn a, 'RTPCR khawl Zodintluanga, MLA donate kha a hma thei anga Microbiology department, Civil Hospital, Lungleiah bun dan lo ngaihtuah tura ngen i ni,' a ti.

Medical Superintendent hnena lehkha a thawn chungchangah hian HME Director chuan, kháwl chu chhe thei a nih avangin a him leh him loh te, nakina hman theih a nih dawn leh nih dawn lohte lo endik tura hriattirna tihchhuah a nih thu a sawi.