Covid-19 vei thi awm belh

June 1, Thawhlehni khan zan lamah Covid-19 vei enkawl lai thi pahnih an awm a; heti hian Mizorama hripui vei thi tawh zat sorkarin a chhinchhiah chu mi 44 an ni a, June 1 bikah mi pali an thi.

Covid-19 vei enkawl lai Hauhnuna (76) h/o Parchhingi, Electric Veng, Aizawl chu Thawhlehni zan dar 8:30 khan State Referral Hospital (ZMC)-ah a thi a, zanah damdawi-ina a ruang riah a nih hnuah nimin chhun khan YMA Hall-ah vui a ni.

Electric Veng khawtlang hruaitute sawi danin, Hauhnuna hi zunthlum leh BP sang nei sa a ni a, a nupui pawh hripui vei a nih avangin SRH-ZMC-ah enkawl mek a ni. Hauhnuna hi Covid-19 positive a ni tih May 8, 2021-ah hmuh chhuah a ni a, a tûk May 9-ah SRH-ah dah luh a nih thu sorkar thuchhuakin a tarlang.

June 1 vêk zan dar 10:40 khan SRH-ZMC-a hripui vei enkawl lai H Vala (76) h/o Zonunthari, Tuithiang, Aizawl chu a thi a, nimin khan Tuithiang YMA Hall-ah vui a ni.

Thu dawn danin, H Vala hi hrawk cancer leh thisen sang nei a ni a, Covid-19 positive a ni tih May 16, 2021-ah hmuh chhuah niin, May 18-ah SRH-ah dah luh a ni. A nupui Zonunthari pawh hripui vei a ni a, SRH-ZMC-ah enkawl mek a ni.