CM Relief Fund for Covid-19 sum Rs. 1,17,46,000 sem chhuah remti

Committee on Utilization of Chief Minister’s Relief Fund for Covid-19 chu an chairman Lalnunmawia Chuaungo, chief secretary hoin nimin khan CS con­ference hall-ah an ṭhu a; inkhârkhip leh inkhuahkhirhna puan chhunga harsatna tâwkte ṭanpui nan leh Covid-19 vanga harsat­na tâwkte tan Rs. 1,17,46,000 sem an remti.

Ṭhutkhawma tarlan danin, Aizawl district-a task force hrang hrangte'n chhungkaw harsa 3,063 an awm thu Aizawl DC-ah an thehlut. Aizawl leh district khawpui hrang hrangah thla khat chuang inkhuahkhirhna khauh taka kalpui a nih tawh avangin hna thawk thei lo mi eng emaw zatin harsatna naménlo an tâwk mek a, khua/ veng hrang hranga task force-te'n chhawmdawl hna an thawk mek a ni.

CM Relief Fund hi district 11-ah task force-te kaltlangin chhungkaw harsate ṭanpui nan Rs. 1,16,26,000 sem chhuah remtih a ni a; tun hnaia Covid-19 vei mi 40 hmuh chhuahna leh hri kái ve lote pawh khung hran vekna Golgotha Camping Centre, Vairengte hnenah Rs. 1,00,000 leh Mizoram páwna Covid-19 vei awmna state-ahte leh Mizoram lama chhungte belh leh pùr tur nei lo, harsatna tâwk mi pahnih hnenah Rs. 10,000 ve ve pek tura rèl a ni bawk.

Meeting-a tarlan danin, CMRF for Covid-19 ah Rs. 1,36,24,137 a awm mek a, ṭanpuina pek chhuah tura nimina remtih zat, Rs. 1,17,46,000 chu pek a nih chuan hman bâng Rs. 18,78,137 a la awm dawn a ni. May thla khan CMRF aṭang hian Rs. 91,50,000 sem chhuah a ni tawh bawk.

Ṭhutkhawmnaah hian additional chief secretary JC Ramthanga, Finance secretary Vanlalchhuanga, NGO Coordination Committee chairman Vanlalruata leh Mizoram Kohhran Hruaitute Committee (MKHC) secretary Rev. R Lalrinsanga te an tel a ni.