Bungraw phurte endik lo turin chah

Kolasib DC Dr H Lalthlangliana chuan, state páwn aṭanga Mizorama bungrua phur luttu lirthei enkawltute chu Covid-19 swab test an nih loh avangin kawng lakah lo tihdin leh endik loh tur a nih thu a tarlang.

Kolasib Bawrhsap tarlan danin, Vairengte kaltlangin engtik lai pawhin lirthei tan Mizoramah luh theih a ni a; Bairabi-ah ni tin chawhma dar 10 leh tlai dar 5 inkarah, Phaisenah Thawhṭanni leh Ningani chawhma dar 10 leh tlai dar 6 inkarah leh Saiphaiah Thawhlehni leh Zirtawpni zing dar 8 leh tlai dar 4 inkarah mihring

phur lirtheite luh theih a ni. Ruahmannate hian bungraw phur lirtheite a huam lo.

Bungraw phur lirthei khalhtu leh puitute chu entry point-ah screening hmang chauha en ṭhin an ni a, swab sample endik a nih loh avangin kawng laka lo tihdin leh endik chu a him lo a, tih loh tur a nih thu tarlan a ni.

Mizoram páwn aṭanga hmun dang kaltlanga Mizorama lutte chu an luhna (entry point)-ah Rapid Antigen Test hmanga en dik vek tur a ni a, RAT positive-te chu kalphung ding lai anga enkawl zui tur a ni. Mizoram aṭanga zin chhuak, haw lehte pawh endik vek tur a ni bawk.