Siahaah hmalakna leh hmachhawp sawiho

Siaha District Covid-19 Food Security Consultative Committee (SDCFSCC) chu nimin khan an chairman Dr K Beichhua, bialtu MLA hoin Siahaah an ṭhu a, hmalaknate leh hmachhawpte an sawiho. K Beichhua hian Siaha division-a hman tur online-a tui bill pekna a tlangzarh nghal.

Dr K Beichhua chuan, Covid-19 léng avangin ei leh bâra harsatna thleng thei laka inruahman nan SDCFSCC din a nih thu a sawi a, "Hei hian Siaha district hi thlak danglam se, hma lam hunah pawh ei leh bara district intodelh leh mahni kea ding thei nihtir tura kawng kawhhmuhin sialsak se," a ti a; Siaha district chu buh leh thlaiah a intodelh thuai a beisei thu a sawi.

Ministry of Tribal Affairs-in Covid-19 dona atan agriculture leh a kaihhnawihah project siam tura a rawn hriattir thu sawiin K Beichhua chuan, "Agriculture, Horticulture, AH&Vety, Sericulture leh Fisheries lamah Mizoram pum tan cheng nuai 2,500 hû project kan thehlut tawh," a ti.

Siaha DC Kesavan R tarlan danin, SDCFSCC hmalakna avangin kum dang aiin Siaha district-ah buh thar a tam a; SDCFSCC hmalaknain chhungkaw 396 tan leilet (WRC) hectare 517.6 chu JCB 14 hmangin zawh niin, Siasi leh Chakhei khuaa leiletah tui lakna siam a ni. April 2020 aṭanga nimin thleng khan SDCFSCC chuan cheng nuai 111.98 a hmang tawh a ni.