Minister-in Siaha tui lâkna a enfiah

Minister of state Dr K Beichhua chuan nimin khan a bial chhung, Siaha khawpui tuia châwmtu tur Augmentation of Urban Water Supply Scheme(AUWSS) hnuaia lei hîpa (gravity) hmanga Thange lui tui lâkna a enfiah a; July 2021 aṭangin tui connection thar pek chhuah a nih dawn thu a sawi.

Dr K Beichhua chuan, tuia Siaha khawpui harsatna chu PHE minister Tawnluia hnenah a thlen tih sawiin, "Deputy CM chuan Special Assistance to States for Capital Expenditure aṭangin ruahmanna min siamsak a, cheng nuai 800 estimate aṭangin nuai 782.765 kan dawng," a ti.

Siaha AUWSS hi March 16, 2021-ah thawh ṭan a ni a, thawh zawh a ni tawh. Phai lam aṭanga media filter a thlen hunah hman theih a ni ang.

Tarlan danin, Siaha khawpuiin ni tina tui a mamawh zat chu litre 14,00,000 a ni a, tunah chuan PHE department-in litre 7,00,000 a pe thei mek. AUWSS hi hman theih a nih chuan Siaha khawpuiin ṭhál laiin ni tin tui litre 14,00,000 leh fûr laiin litre 17,00,000 a hmu thei tura ngaih a ni.