HSLC 2021-ah zirlai 82.43% an pass : Mizorama HSLC result ṭhat ber ṭum a ni

Mizoram Board of School Educa­tion (MBSE) chuan nimin chhun dar 12 khan High School Leaving Certificate (HSLC) Examination 2021 result a tichhuak a, zirlai exam 18,012 zinga 14,847 an pass a, pass percentage chu 82.43 niin, a san ber ṭum a ni. Nikum 2020 aiin pass zat 2,523-in an tam zawk.

HSLC 2021-ah hian pakhatna chu Lalnunmawia s/o RL Chanchinmawia, Durtlang North, St. Joseph Higher Secondary School a ni a; top 10-a lang mi 13-te chu Mizo vek niin, mipa paruk leh hmeichhia pasarih an ni.

Kumin HSLC Examination-ah hian exam hmachhawntu zirlai 18,012 an awm a, regular student 17,775 leh private-a exam mi 237 an ni a; regular-a exam zingah 14,685 (82.62%) pass in, private candidate 237 zinga 162 (68.35%) an pass. Zirlai pass 14,847-te chu hmeichhia 8,024 leh mipa 6,823 an ni a, pass percentage-ah pawh hmeichhia an sang zawk.

Zirlai 2,904 chu distinction-ah an pass a, distinction-a pass zat hi nikuma mi 851, kum 2019-a mi 1,177 leh kum 2018-a mi 1,068 aiin an tam zawk hle. First division-ah zirlai 5,218 leh second division-ah 4,863 an pass a, nikum aiin an tam zawk hle a; third division-ah zirlai 1,862 pass in, nikumah 4,094 an pass. Compartmental chance nei zirlai 309 an awm a, zirlai 2,856 (nikumah 5,552) an fail a ni.

Kumin HSLC-ah hian top 10-ah mi 13 an lang a, subject mala full mark hmu mathematics-ah mi pariat leh science-a mi pahnih an awm. Zirlai exam pass vekna sikul 175 a awm a, kum dang aiin a tam fál hle a, pass awm miah lohna sikul pasarih chiah a awm thung. Candidate-te pass vekna sikul hi nikumah 65, kum 2019-ah 72 leh kum 2018-ah 105 a awm a; zirlai fail vekna sikul nikumah 16, kum 2019-ah 24 leh kum 2018-ah 15 a awm.