Covid-19 hnuah thlai man a pung : Sa man a pung tam lo thung

Directorate of Economics & Statistics hnuaia Analytical Study Group-te'n an zir chiannaa a lan danin, Covid-19 lèn hnuah thlai man a sang hle a, sa man erawh a sàn phah nasa lo.

Analytical Study Group hian Aizawl Municipal Corporation (AMC) huam chhunga thlai 21 leh sa chi ruk man an zir chiang a ni. An zir chiannaa a lan danin, Covid-19 lèn hmain thil ṭhenkhat chu thuneitute'n a man tura an bithliah aia tláwma zawrh a ni a, hripui lèn hnuah erawh chuan a tam zawk chu thuneitute bituk aia sanga zawrh a ni tawh.

Study Group hian May 25, 2021-a sorkar thuneitute'n thlai leh sa man an bituk chu zir chianna atan an hmang a; Covid-19 lèn hnua a man bituk aia tláwma la zawrhte chu - hmarcha tê, iskut, sawhthing, samṭawk, tomato, vawk sa, bawng sa leh kelsate a ni. Hetih lai hian, Covid-19 lèn hma aia a lèn hnua thil man tláwm zawk a awm lo.

Analytical Study Group hian hmun hrang hranga thil man an zawt a; thil man hi kum 2019 leh 2020-a October, November leh December thlaa mite zir chian a ni.