KHAWTHLIR

Thisen pe
Evangelical Church of Maraland KTP, Siaha Edenthar Branch chuan nimin khan Siaha District Hospital tan thisen unit 20 an pe a, petute mipa 18 leh hmeichhia pahnih an ni.

Hmanrua pe
Deputy chief minister Tawnluia chuan nimin khan a biala vawk hri African Swine Fever (ASF) léng mek do nan Khawzawl Veterinary Hospital-ah hmanraw chi hrang hrang a pe.May 10 khan Khawzawl chu ASF infected area-ah puan a ni a, nimin thleng khan ASF vangin vawk 170 a thi tawh.

CYMA lawm
Central YMA chuan thuchhuah siamin, MBSE-in HSLC Examination 2021 result an puang ta chu lawmawm an tih thu leh thawktute inpekna chhuanawm an tih thu an tarlang. CYMA chuan, HSLC 2021-a zirlai exam zinga 82.43% an pass chu lawmawm an tih thu te, pass tharte an lawmpui thu te, pass lote chu beidawng loa kal zel tura an duhsak thute an tarlang a, "YMA kumpuan, 'Zirna uar' a hlawhtlin zel theih nan theihtawpin i ṭang tlang zel ang u," an ti.

Hmalakna thlirho
Aizawl DC Dr Lalhriatzuali Ralte kaihhruaiin nimin khan sorkar hotute'n Aizawla containment area/zone puan dan an thlir. Hmalak tawh dante an sawiho hnuah, LTF pawimawh dan leh containment area/zone puan vat a ṭul chhan hriat chian a ṭul zia tarlan a ni a, containment area puan kawngah LTF-te chu engmah tihkhawtlaina siam lo tura ngen zel ṭha an ti a ni.

SRH-ah mi 21-in Ventilator hmang
State Referral Hospital-ah nimin tlai dar 5 thleng khan Covid-19 vei mi 193 enkawl mek an ni a, an zinga 33 chu ICU-ah awmin, ventilator hmangin mi 21 enkawl mek an ni. SRH-ZMC Bulletin tarlan danin, nimin khan hripu vei SRH-ah mi 10 dah luh a ni a, mi 17 chhuahtir a ni thung. Enkawl mek mi 193 zinga 160 chu ward hrang hrangah an awm a ni.