Covid-19 vei mi 46 thi tawh

Covid-19 vei enkawl lai June 2, Nilaini zan leh niminah mi pakhat ve ve an thi a, nimin tlai dar 6 thlenga Mizorama Covid-19 vanga thi tawh zawng zawng chu mi 46 an ni.

State Referral Hospital (ZMC)-a hripui vei enkawl lai Lenbuangi (92) m/o Lalhmuchhuaka, Bawngkawn chu Nilaini zan dar 9:45 khan a thi a, nimin chawhma dar 10 khan vui a ni.

Lenbuangi hi Covid-19 positive a ni tih May 27, 2021-ah hmuh chhuah a ni a, May 28-ah SRH-ah dah luh a nih thu, sorkar thuchhuakin a tarlang.

Nimin zing dar 7:15 khan SRH-ZMC-a Covid-19 vei enkawl lai JH Chungliana (57) h/o Tlanghmingthangi, Chhinga Veng a thi a, nimin chhun dar 1 khan vui a ni.

JH Chungliana hi Covid-19 positive a ni tih May 12, 2021-ah hmuh chhuah a ni a, May 14 khan SRH-ah dah luh a ni. Amah hi zunthlum nei a nih thu sorkar thuchhuakin a tarlang.