Lungleia RTPCR khâwl bun lohah Chhuanlam tling a awm loah ngai

RTPCR for Chhimbial chuan thuchhuah siamin, tun dinhmunah Lungleia RT-PCR khawl bun theih a nih loh chhanah chhuan­lam tling an hriat loh thu an tarlang.

RT-PCR for Chhimbial chuan, Hospital & Medical Education (HME) director Dr T Lalhmangaihi'n June 2, Nilainia Lungleia thuthar thehdarhtute leh YMA Sub-Head­quarters hruaitute a kawmna chu uluk taka an zirchian thu an tarlang a, "Lunglei hi Mizoram chhim lam district dangte tan pawha hmun pawimawh a nihna min hriatpui thu leh health infrastructure lama Lunglei tihhmasawn an ngaih pawimawh thu kan hriat hian kan lawm hle," an ti.

HME Director-in zawhna a chhannaah, RTPCR dahna hmun tur laboratory block siam tuma hmalak a nih thu a sawi chu ṭha an tih thu sawiin RTPCR for Chhimbial chuan, "Tun dinhmuna RTPCR khawl install nghal a nih theih lohna chhan pakhatmah sorkar thuchhuakah a lang lo," an ti a; HME Director thusawi aṭangin sorkarin a duh phawt chuan RTPCR khawl chu a hmang nghal thei tih a nemnghet niin an sawi.

RTPCR for Chhimbial chuan, tun din­hmunah TrueNat neih belh ngawt aiin RTPCR hman thuai chu an duh a nih thu sawiin, "Rang lehzualin test ngaite test zung zung theih a ni dawn. Darkar khat leh a chanveah TrueNat Mono-in sample pakhat a test thei a, TrueNat Quattro-in sample pali a test thei. RTPCR erawh chuan darkar 5 chhungin awlsam takin sample 450 a test thei turah kan ngai," an ti.

An thiam dana hma an lak zel dawn thu sawiin RTPCR for Chhimbial chuan, "Keini chêt vak kher nghak loa a rang thei ang bera kan sorkar hian Lungleia RTPCR hman ngei theih tura a install fel theih chuan kan lawm hle ang," an ti a; an hmalakna thláwptu mipui chunga an lawm thu an tarlang.

RTPCR bun a nih theih nan hian RTPCR for Chhimbial chuan mipuiin thawhlawm an thawh theihna tur an siam a, June 2, Nilai­ni thleng khan Rs. 1,60,000 vel an hmu tawh a ni.